Riifoormiin Itiyoophiyaan gaggeessaa jirtu Invastimantiif haala mijataa uumeera

Ebla 16/2018 (ENA)- Riifoormiin dinagdee Itiyoophiyaan gaggeessaa jirtu dirree Invastimantii mijataa fi tilmaamuun danda’amu uumaa akka jiru hogganaan dame invastimantii fulla’aa fi itti gaafatama hawaasummaa Steefan Kiraatzish ibsan.

Steefan Kiraatzish fooyyessoonni kunneen invastimantii kallattii alaa fi kaappitaala biyya keessaa hawachuuf faayidaa olaanaa akka qabaatu turtii Itiyoophiyaa waliin taasisaniin ibsaniiru.

Kun ammoo Invastimantiin kun carraa hojii uumuuf, misooma walitti hidhata sonaa fi guddina daldala alergiif gumaacha akka taasisu godha jedhaniiru.

Baay’inni ummata Itiyoophiyaa carraa gabaa guddaa akka uumu fi kun ammo dureeyyiin biyya keessatti akka babal’isan akkasumas karaa hammattoo daldala bilisaa ardii Afriikaa gara gabaa riijinii fi Ardiitti akka galan carraa akka uumu dubbataniiru.

Invastimantii kallattii alaa misooma industirii biyya keessaa waliin wal simsiisuun barbaachisaa ta’uu kan dubbatan hogganaan kun, fayyadama waloo mirkaneessuuf kanneen akka shariika waloo fi tumsi mootummaa fi damee dhuunfaa barbaachisaa ta’uu cimsanii kaasaniiru.

Invastimantiiwwan hammatoo carraa hojii akkasumas murteessummaa dubartootaa fi dargaggootaa mirkaneessaniif dursi kennamuu akka qabu hubachiisaniiru.

Itiyoophiyaan sochii industirii Afriikaa keessatti adda duree ta’uuf carraan qabdu bal’aa ta’uusaa fi biyyoota Afriikaa biroofis fakkeenyummaan eeramuu akka dandeessu dubbataniiru.

Yunidoon misooma industirii Itiyoophiyaa gama teekiniikaan, gabbisa dandeettii fi gorsa imaammataan deeggaraa jira.