Naannoo Oromiyaa Godina Shawaa Lixaatti  qophiin biqiltuuwwan ganna dhufu dhaabamaniii bal'inaan gaggeeffamaa jira.

Bitootessa 20/2018(ENA)- Naannoo Oromiyaa Godina Shawaa Lixaatti  qophiin biqiltuuwwan ganna dhufu dhaabamaniii bal'inaan gaggeeffamaa jiraachuu Waajjirri Qonnaa Godinichaa  beeksiseera.

Waajjirichatti Ogeessi misooma bosonaa Obbo Guddataa Xuurii ENA’f  akka ibsanitti, biqiltuuwwan qophaa’aa jiran keessaa soorataaf kan oolanii fi sanyiiwwan fuduraa  akka keessatti  argaman dubbataniiru.

Baatiiwwan gannaa keessatti walumaagala lafa hektaara kuma 94 ol irratti sagantaan  dhaabbii  biqiltuu akka gaggeeffamu ibsuun;  hojiin biqiltuu biqilchuu Aanaalee Godinichaa hunda keessatti kutaalee hawaasaa garaagaraa hirmaachiseen hojjetamaa jiraachuu  ibsaniiru.

Qophiin kun fayyadamummaa qonnaan bulaa itti fufinsa qabu  mirkaneessuuf akka danda’uuf sanyiiwwan biqiltuu oomishtummaan isaanii ol’aanaa ta’ee fi fooyya’an irratti xiyyeeffannoo gochuusaanii  eeraniiru.

Sagantaalee 'Ashaaraa Magariisaa' waggoottan darbanitti  raawwatamaniin bu’aawwan jajjabeessaan galmeeffamuu isaanii ibsuun,  biqiltuuwwan dhaabaman kunuunsuu fi eeguurrattis xiyyeeffannoon hojjetamaa jiraachuu dabalanii ibsaniiru.

Biqiltuuwwan dhaabaman  naannoo (ecosystem) jijjiiruu keessatti gahee ol'aanaa taphachuu bira darbee, harawwan goganii turan deebi'anii bishaan akka qabatan gochuun qonnaan bulaaf haala mijeessuusaanii dubbataniiru.

Waggoottan torban darban  walii gala lafa hektaara kuma 616 fi 613 irratti biqiltuuwwan dhaabamuusaanii yaadachiisuun; hawaasni naannichaa aadaa  bosona eeguu qabuun milkaa’ina misooma magariisaatiif gumaacha guddaa gochaa jiraachuu ibsaniiru.