Dameen Abaaboo, Muduraa fi kuduraa Ce’umsa Qonnaarra darbee guddina Dinagdee hunda galeessaaf qooda olaanaa bahachaa jira

Bitootessa16/2018(ENA)- Dameen Abaaboo, Muduraalee fi Kuduraalee Ce’umsa Qonnaan olitti,galii sharafa alaa argamsiisuu fi guddina Dinagdee walii galaatiif gahee olaanaa gumaachaa jiraachuu Ministir  Deetaan Qonnaa, Doktar Sofiyaa Kaasaa ibsaniiru.

Agarsiisnidaldalaa Waldaan Omishtootaa fi Al-ergitoota Abaaboo,kuduraalee fi muduraalee  Itiyoophiyaa  (EHPP) Idil-Addunyaa waliin qindaa’uun  qopheessan Bitootessa  15 hanga 17 bara 2018tti Finfinneetti  gaggeeffamaa jira.

 

Waltajjicharratti, Deetaan Ministira Qonnaa, Doktar Sofiyaa Kaasaa, Itiyoophiyaan damee Abaaboon, Muduraalee fi kuduraaleen  dandeettii  qabdu, caalaatti guddisuuf  mootummaan damee dhuunfaaf haala mijataa  uumuusaa  ibsaniiru. 

 Kanaanis damicha Sadarkaa Idil-Addunyaatti, Imaammata Qonnaa fi  misooma baadiyaa  akkasumas tarsiimoon Abaaboo, Muduraa fi Kuduraa  bocamee   hojiitti galamuu  eeraniiru.

Itiyoophiyaan Omishaalee Hortii Kaalcherii  gara Alaatti ergiturraa  galii sharafa Alaa olaanaa jiraachuu ibsuun, agarsiisni daldalaa kun  Omishtoota  warra  bitattoota Addunyaa waliin kallattiin   walitti  fiduun  akka riqicha guddaatti tajaajila jedhaniiru.

Itiyoophiyaan  yeroo ammaa  Afriikaa keessaa  Keeniyyaatti  Aanuun Abaaboo Omishuu fi  gara Alaatti erguun biyya 2ffaa ta’uushee ibsuun, dameen kun guddina walii gala biyyattii (GDP) argannoo sharafa alaatiif gumaacha olaanaa  taasisaa jiraachuu  eeraniiru.

  Daarektarri  waldaa Omishtootaa fi Al-Ergitoota Abaaboo , Kuduraa fi Muduraa ItiyoophiyaaObbo Naggaa Mokaanninti gamasaaniin Eksipoon kun, omishaa fi tajaajila beeksisuu bira darbee  namoota damee kana keessatti qooda fudhatan  bakka tokkotti walitti fiduun  tumsa(hidhata) daldalaa cimsuuf  akka  kaayyeffate  ibsaniiru.

 

Dameen Hortiikaalcherii Bunatti aansuun madda sharafa Alaa guddaa Itiyoophiyaa ta’uusaa  eeruun, bara baajataa darbetti Dinagdee biyyaatiif doolaara miiliyoona 564 tuqaa 89 galii  argamsiisuusaa ibsaniiru.

Daaretarri Bulchiinsa tajaajila  fe’umsaa daandii qilleensa Itiyoophiyaa Obbo Darajjee Daraaroo Daandiin Qilleensa Itiyoophiyaa  damee Aviyeeshinii Afriikaa keessaa  dursaa ta’e , oomishaalee Abaaboo fi muduraalee gabaa Addunyaatiif dhiyeessuurratti gumaacha guddaa taasisaa akka jiru ibsaniiru.

 

Itiyoophiyaatti Ambaasaaddarri Neezerlaandi KiristiinPeereen , Itiyoophiyaa fi Neezerlaandis michummaa seenaa qabeessaa fi tumsa yeroo dheeraa qabaachuusaanii ibsaniiru.

Industiriin, Misooma Abaaboon, Invastimentiin,  Cehumsa  beekumsaa fi Teekinooloojiin , akkasumas  deeggarsa ogummaa taasisuun, gumaacha gochaa jiraachuu  eeranii, fuuldurattis tumsi hunda galeessa isaanii  caalaatti cimee akka  itti fufu mirkaneessaniiru.

Agarsiisa daldalaa guyyoota sadiif turu kanarrtti,  biyyoonni 50 ol kan bakka bu’an yoo ta’u  Omishtoota, dureeyyota biyya keessaa fi biyya Alaa, dhiheessitoota teekinooloojii fi dhaabbileen faayinaansii 150 ol ta’an  akka irratti hirmaatan beekameera.

Turtichaan  dhimmoota faayidaa olaanaa qaban  kanneen akka hubannaa  nam-tolchee(AI), Faayinaansii itti fufinsa qabu,  Wabiinyaataa,  Loojistiksii fe’umsa Galaanaa fi kalaqa Teekinooloojii jijjiirama qilleensa dandamatan  irrattti  xiyyeefachuun  mariiwwan bal’aan akka  gaggeeffamu  ni eegama.