Magaalaa Baatuutti Bulchiinsaa fi itti fayyadama lafaarratti hojiiwwan hojjetaman bu’aa qabeessadha 

Bitootessa 8/2018(ENA)–Naannoo Oromiyaa Magaalaa Baatuutti  Sirna Bulchiinsaa fi itti fayyadama lafaa Ammayyeessuun, weerara lafaa seeraan alaa ittisuurratti  bu’aa gaariiin  galmaa’uun ibsameera. 

Itti gaafatamaan Bulchiinsa Lafa Magaaalichaa Obbo Kidaanee Turaa ENA’f akka ibsanitti, qabeenya lafaa sirnaan bulchuu fi Al-seerummaa damichaan mul’atu ittisuuf  hojii hojjetameen bu’aan qabatamaan argameera. 

Kunis deddeebbii hawaasarra gahaa ture hir’iseera kan jedhan hogganaan kun, hojiiwwan jijjiiramaa baatiiwwan darbanitti   hojjetamaniin bu’aan abdachiisaan  argameera jedhaniiru.
  
Faayila baasuu ( barbaaduu) fi yeroo maqaa jijjiiruu komiiwwan turan kan hanbise yoo ta’u,  keessumaa qabiyyee tokkorratti  kaartaa lamaa ol baasuun hojmaatni  badaan raawwatamaa ture akka dhaabbatu ta’eera jedhaniiru. 

Qabiyyeewwan seera qabeessa ta’an gara kaadastara ammayaa’aatti akka galan ta’uusaatiin galiin magaalichaa lafarraa argamu  akka dabalu taasisuu hubachiisaniiru. 

Dabalataanis qabiyyeewwan dabalataa dhaabbilee fi namoota dhuunfaan qabamanii turan sirna Liiziin gara seera qabeessatti akka galan taasifamuu hubachiisaniiru. 

Labsii liiziin dura kan turan qabiyyeewan seeraan Alaa gara kaadastara seera qabeessaatti akka galan taasifamuu kaasaniiru.

Bara baajatichaatti kaartaa kaadastara  dijiitaalaa  kennamuusaanii fi  qabiyyeewwan kuma 11 ol gara kaadastaraatti akka galan taasifameera jedhaniiru. 

Walii gala hojmaaticha gara sirna ammayyaatti jijjiiruun danda’amuusaatiin bara baajatichaatti hanga ammaatti, galiin birrii Miiliyoona 144 ol argamuusaa eeraniiru. 

Lafti  hektaarri  46 seeraan ala qabamee ture  gara baankii lafaatti deebisiisuun danda’amuusaa ibsaniiru. 

Yeroo amma tajaajiloota lafa waliin wal-qabatanii jiran guutummaa guutuutti gara sirna on-laayiniiti (dijiitaala) taasisuuf qophiin taasifamaa jiraachuu ibsaniiru.