Godina Gujiitti biqiltuuwwan hongee dandamatanii fi Faayidaa Diinagdee qaban qophaa’aa jiru 

 Bitootessa 2/2018 (ENA)– Naannoo Oromiyaa Godina Gujiitti Sagantaa Ashaaraa Magariisaa bara kana hojjetamaniif  biqiltuuwwan hongee fi mancaatii bosonaa itti fufinsaan dandamatan  qophaa’aa jiraachuu  Waajjirri Qonnaa Godinichaa beeksise.
Waajjirichatti Dursaan Garee Qabeenyaa Uumamaa Wandoo Sharbootee ENA’f akka  ibsanitti, godinichatti biqiltuun buufataalee biqiltuuu 170  ol keessatti qophaa’aa akka jiruu fi hanga ammaatti Biqiltuuwwan Miiliyoona 89 tuqaa 3 qophaa’aniiru jedhaniiru.
 

Qaama Sagantaa  Ashaaraa Magariisaa  kan ta’e qophiin biqiltuu  haala qilleensa Godina Gujii Baddaa, Gammoojjii fi baddadaree  kan gidduugaleeffate ta’uu ibsaniiru. 

Sanyiiwwan biqiltuu dhaabbiif qophaa’an keessaa, Gaattiraa, Giraaviiliyaa, Ejersa, Waddeessa Bakkanniisaa fi kanneen biroon akka  keessatti argaman eeraniiru.

 
Akkasumas biqiltuuwwan miidhagina magaalaa, nyaata beelladaaf, soorataaf oolanii fi  Faayidaa Diiinagdee kan qaban kanneen akka Avokaadoo, Maangoo, Muuzii, Gishxaa fi  kanneen biroon qophaa’aa jiraachuu himaniiru. 

Biqiltuuwwan kana misoomsuu fi bu’aa  qabeessa taasisuuf tuttuqaa namaa fi beelladaarraa  lafti hektaarri kuma 21 fi 340 ol  qophaa’uusaa  hubachiisaniiru.
 
Ganna dhufu hojii biqiltuu dhaabbii gaggeeffamurratti uummata kuma 205 ol hirmaachisuuf hojiin  dadammaqsaa fi hubannaa uumuun hojjetamaa jiraachuu  beeksisaniiru.