Inistitiyuutichi Aadaa, Seenaa fi duudhaalee ummataa irratti qorannoowwan  gama hedduun   gaggeessaa jira

Guraandhala27/2018(ENA):-Inistitiyuutiin Qorannoo Oromoo Aadaa, Seenaa fi duudhaalee ummataarratti hojiiwwan qorannoo fi qo’annoo  hedduu gaggeessaa jiraachuu beeksise.

Itti Aanaan Daarektara Olaanaa Inistitiyuutichaa obbo Zinaabuu Asiraat akka ibsanitti, dhaabbatichi Aadaa, seenaa, duudhaa, Aartii,fi guddina Afaan Oromoorratti  xiyyeeffannoo kennee hojjechaa jira.

   Dargaggoonni naamusa gaariin guddinaa fi misooma biyyaaf akka tattaafataniif gaheen qaamolee qooda fudhattootaa cimuu qaba jedhaniiru. 

Kana bu’aa qabeessa gochuuf Yuunvarsiitii Arsii fi  dhaabbilee olaanoo  Naannichatti argaman biroo waliin, komishinii Tuurizimii , gidduugala Qorannoo Aadaa Oromoo, Biiroo Dargaggoo fi Ispoortii waliin  qindoominaan hojjetamaa jiraachuu  ibsaniiru.

Itti Aanaan Daarektara Olaanaa Inistitiyuutichaa itti dabaluun,hanga ammaatti qaamolee qooda fudhattoota waliin qindoomuun hojiiwwan  qorannoo 70 ol  raawwatamuusaanii  eeraniiru.

 Isaan keessaa kitaabileen 30 ol Seenaa,Afaanii fi Aadaarratti  xiyyeeffatan maxxanfamanii Hawaasaa  dhihaataniiru jedhaniiru.

Hojiin kun aadaa dubbisa dargaggootaa  cimsuu fi  naamusa hunda galeessa akka gonfataniif  qooda olaanaa   akka qabu hubachiisaniiru.

Bu’aawwan qorannoo fi qophiilee Kitaabaa Ilaalchisuun dargaggoonni yaada kennan, hojichi hanqina hubannoo dhaloota biratti mul’atu  furuuf  akka gargaaru  ibsaniiru.

Dargaggoo Siraaj Ahimad akka ibsetti, dubbisuun dargaggoonni waa’ee eenyummaa fi Aadaa Hawaasaa akka  beekan taasisa.

Sirni Gadaa bu’uuraa fi eenyummaa keenya kan jedhe dargaggoo Siraaj, waa’ee sirnichaa fi duudhaalee Oromoo irratti beekumsa gahaa argachuuf Aadaa dubbisuu keenya gabbisuu qabna jedheera.

Dhaloonni haaraan  hojii tuffachuu keessaa bahee, hojiiwwan misoomaa irratti dammaqinaan hirmaachuu akka qabu ibseera.