Deeggarsi hunda galeessa mootummaa bunni Itiyoophiyaa dorgommii Idil- Addunyaarratti qabu  guddisa jira  

Guraandhala3/2018(ENA)-  Deeggarsa hunda galeessa mootummaan damee bunaarratti taasisuun  bunni Itiyoophiyaa gabaa Idil- Addunyaarratti dorgomummaa fi filatamuummaasaa  sadarkaa olaanaan guddisuusaa   Al-ergitoonni damichaa ibsan.

Yeroo ammaa barbaadamummaa Bunni Itiyoophiyaa Sadarkaa Idil -Addunyaatti qabu dabalaa dhufuusaan olitti  bakeewwan gahumsa gabaa haaraan dabalaa jiru.

Kana hordifuun biyyattiin sharafa alaa argattu yerootii gara yerootti guddina argisiisaa kan jiru yoo ta’u, Itiyoophiyaan bara baajataa 2017 buna toonii  kuma 469 gabaa Idil -Addunyaaf erguun, galii doolaara biiliyoona 2 tuqaa 65n argachuu dandeesseetti.

 Kunis Seenaa Bunaa  biyyattiitti galii guddaa fi  sadarkaa qulqullinaa ta’ee  kan galmaa’e yoo ta’u , mootummaan bu’aa kana  ittifufsiisuun   bara baajataa qabame galii argamu gara doolaara biiliyoona  3tti  guddisuuf xiyyeeffannoon hojjetamaa jira.

 

Al-ergitoonni Bunaa ENA’f yaada kennan  akka  jedhanitti  guddinnii fi milkaa’inni damee bunaan dhufaa jiruuf deeggarsi mootummaa guddaadha jedhaniiru.

Daaretarri  Al-Ergii  Buna  Ispeeshaalayizii  Taaddasaa Dastaa  Obbo Gabira Masqal Haayiluu  akka jedhanitti, Xiyyeeffannoo addaa  mootummaan dame kanaaf kenneen bunni  Itiyoophiyaa biyyoota Awurooppaa,  Ameerikaa fi Chaayinaa  bira darbee  kutaalee Addunyaa hunda keessatti  akka barbaadamu taassiseera.

 

Kanaanis lakkoofsi maammilli dhabbataasaanii sadarkaa guddaan dabaluusaa  mirkaneessaniiru.

 Ammaan dura bakki gahumsa bunaa xiqqoo kan turan  yeroo ammaa  bal’inaan rabsamuusaa  fi  Maamiltoota Idil-Addunyaarra yaanni   kennamu gaarii ta’uusaa    hojii gaggeessaan   Tiraakoon Tireeding  kofii  Sorsingii Saamii Eeliyaas  ibsaniiru.

 

Keessumaa xiyyeeffannoo mootummaan  dhiheessii lafaa fi  adeemsa daldala alaaf kenneen   Al-ergitoonni haamlee  guutuun akka  hojjetan  isaan gargaareera jedhaniiru.

Hundeessa fi hojii gaggeessan  “ EMMA Coffee”  Maawahaa Sayid  buna qulqullinaa fi baay’inaan dhiheessuun  guddina diinagdee biyyaaf qooda olaanaa gumachaa jiraachuu  himaniiru.

 

 Deeggarsa maallaqaa mootummaan isaaniif taassise  hojiisaanii isaniif salphisuu fi  bu’aa qabeessa akka  ta’anis   ibsaniiru.

Al-ergitoonni kunnneen  omisha qulqullina qabu dhiheessuu itti fufuun  galii sharafa alaarraa argmu   guddisuuf  kutannoo qaban ibsuun,  mootummaan deeggarsa hunda galeessa taassisu  cimsuun akka itti fufu gaafataniiru.