Ispoortessitoota bakka bu’an horachuuf xiyyeeffannoon kennameera – Ministira Shawwiit Shaankaa 

Guraandhala1/2018 (ENA)- Ispoortiin Ijaarsa Naamusaa fi  Ispoortessitoota bakka bu’an horachuuf  dandeettii qabu milkeessuuf  xiyyeeffannoon kennamuu Mistirri Aadaa fi Ispoortii  Shawwiit Shaankaa   ibsan.

Dorgommiin madaallii   Ispoortii guddattoota  biyyoolessaa  mata duree “Guddina Ispoortessitootaa egeree, guddina Ispoortii keenyaaf” jedhuun  Istaadiyeemii Yuunvarsiistii Saayinsii fi Teekinooloojii Adamaatti   har’a eegalameera.

 

Mistirri Aadaa fi Ispoortii Shawwiit Shaankaa wayitasana akka jedhanitti, Ispoortiin ijaarsa Naamusaa fi dhaloota bakka bu’u horachuuf humna qabu mikeessuuf  xiyyeeffannoon kennamuu   ibsaniiru.

Ispoortii Ijaarsa biyyaa fi qooda walitti hidhaminsa hawaasaa guddisuu dandeessisuuf   qindoominaan hojjetamaa jiraachuu  dubbataniiru.

  Ispoortessitoota bakka  bu’an  horachuuf  sirni fo’annoo fi leenjii   diriiruun cinaatti dhaqqabamummaa bu’uuraalee misoomaa Ispoortiif  xiyyeeffannoon kennamuu  kaasaniiru.

 

Waggoottan saddettan darban  Iddoowwan Ispoortiin itti shaakalamu kuma 17 fi 636  ta’an  biyyattiitti ijaaramanii  tajaajila dandeettii gahumsa qaamaa  fi  sammuu  guddattootaa  gabbisuuf akka oolan taassifamuu ibsaniiru.

 Dorgommiin har’a Adaamaatti eegalame Ispoortisitoota bakka bu’an horachuuf  qooda murteessaa qabaachuu eeraniiru.

Hoggantuun Biroo dargaagoo fi Ispoortii Oromiyaa Roozaa Biyyaa akka dubbatanitti, Naannichi damee misoooma Ispoortiif xiyyeeffannoo kennuun  leenjii kennaa jira.

 

Misooma ispoortii  milkeessuuf Magaalotaa naannichaa fi  Aanaawwanitti bakka shaalaka ispoortii misooma koriideraa waliin wal qabsiisuun  hojjetamaa  jiraachuu  eeraniiru.

Har’a gosawwan Ispoortii 15n guddatoota kuma 3 ol  naannoolee  hundarraa dhufan dorgommicharratti hirmaachaa jiru jedhaniiru.

 

Kantiibaan Bulchiinsa Magaalaa Adaamaa obbo Haayiluu Jaldee  gamasaaniin  magaalittii jirattotaaf mijattuu taassisuuf bu’uuraalee misoomaa Ispoortii fi kanneen biroon ijaaramaa  jiru jedhaniiru.

Guddattoonni kun sammuu fi qaamaan akka gahooman  bakkeewwan bashannanaa fi  Ispoortii  bal’inaan ijaaramaa jiraachuu  hubachiisaniiru.