Magaalaa Naqamteetti Dargaggoonni Indaastirii Godoorratti gurmaa’anii hojiitti galan  bu’aa qabeessa ta’aa jiru 

Guraandhala 1/2018 (ENA) Godina Wallaga Bahaa Magaalaa Naqamteetti  dargaggoonni  waldaan gurmaa’uun hojii  damee  Indaastiriirratti bobba’an  bu’aa qabeessa ta’aa dhufuusaanii  ibsan.   Dargaggoonni  kun dameelee hojii irratti bobba’aniin  bu’aa qabeessa ta’uusaaniin, mataasaniitta darbanii namoota biroof carraa hojii uumuusaanii  ENA’f ibsaniiru.

Magaalichatti  hojii  bu’aawwan pilaastikaa deebisanii fayyadamuurratti kan bobba’an  durataa’aan  waldaan  Ammayyuu fi  Fintaayee  dargaggoo   Ammayyuu Darajjee  yeroo gabaabaa  gurmaa’an keessatti bu’aa qabeessa ta’aa dhufuusaanii dubbateera.

Waldichi Liqaa motummaarraa  birrii  miiliyoona 4 tuqaa 5 argateen pilaasitikiiwwan hojiirra oolani  deebisanii  omishuun, omishasaanii  tajaajilota adda addaaf  gabaaf dhiheessaa jira jedhaniru.

 

 Dargaggoo Ammayyuun dabaluun dargaggonni yerosaanii sirnaan fayyadamuun omishuu akka danda’aniif mootummaan haala liqaa mijeessu, bakka hojii  akkasumas leenjii fi deeggarsa  fayyadamuu akka  qaban  hubachiisaniiru.

Waldaansaaniis bara kana gurmaa’uunii fi cimanii hojjechuun bu’aa galmeessaniin dargaggoota biroo14f carraa  hojii uumuusaanii  eeraniiru.

    Dargaggoota carraan hojii isaaniif uumameefii keessaa  Shamarree   Daraartuu Gabbisaa yeroo ammaa  carraa hojii argatteen  ji’attii  birria  kuma 6 fi 500 ol argachuun hojjechaa jiraachuushee  ibsiteetti.

 

Gara fuuladuraattis  deeggarsa taassifamuu fi muuxannoo argatteen   of dandeessee hojjechuuf karoorsuushee  ibsiteetti.

 Itti Annaan Durataa’aa Waldaan Shaarikaa biroon  Sanyii, Addunyaa, Kuulanii fi  Hiriyootasaanii, Dargaggoo Sanyii Gaaddisaa  Bulchiinsichi  bakka hojii fi liqaa birrii Miiliyoona 2 tuqaa 5 isaaniif mijeesseen hojii mukaarratti  bobba’uun hojjechaa  jiraachuu ibsaniiru.

Waldaasaaniis carraa hojii dargaaggoota kudhaniif uumuusaa ibsuun, gara fuuladuraattis hojicha babal’isuun  dargaggoota hedduu fayyadamoo carraa hojii taassisuuf  cimnee hojjenna jedheera.

Itti Gaafatamaan Waajjira Carraa Hojii Uumuu fi Ogummaa Magaalaa Naqamtee obbo Biraanuu Asaffaa  magaalichatti dargaggoota gurmeessuun hojiitti galchuuf karoora qabameen   hojiin bu’aa qabeessi galmaa’aa jira jedhaniiru. 

 

Bara baajataa qabametti waldaalee79 gurmeessuun birrii miiliyoona121 liqeessuun hojiilee adda addaarratti  bobbaasuu danda’uu  ibsaniiru.

Dargaggoonni kun yaadawwan hojii haaraa maddisiisuunii fi gurmaa’anii hojjechuun omishasaanii magaalichaa fi jiraattota naannichaaf  dhiheessaa jiru jedhaniiru.

Indaastiriiwwan godoo Magaalichatti argaman keessatti  hojii  omisha Mismaaraa, Uffata hodhuu, Hojii Maashina muka Baqaqsuu, omisha Bilookkeettii fi  Teeraazoo dabalatee  kanneen biroon akka  argamu  dubbataniiru.

Obbo Biraanuun itti dabaluun  hojichaan  dargaggoota bu’aa qabeessa  taassisuurra darbee aadaa hojiisaani jijjiiruun  gara fuuladuraatti bu’aa  caaluuf  gahoomsuun kaayyoosaanii guddaa ta’uu ibsaniiru.

 Bulchiinsi Magaalichaa Dargaggootaaf hojii deeggrsaa fi hordoffii  kan cimsu ta’uu  ibsaniiru.