Naannoo Oromiyaatti Jireenya Horsiisee bulaa foyyessuuf  hojii hojjetameen bu’aan argamaa jira

Amajjii 17/2018(ENA)- Naannoo Oromiyaatti humna Hongee dandamachuu danda’u ijaaruun Jireenya Horsiisee Bulaa foyyessuuf  hojii hojjetameen bu’aan  gaariin argamaa jiraachuu  Biiroon Misooma Jallisii fi Horsiisee bulaa  ibse. 

Itti Aanaan Hogganaan Biiroo Jallisii fi Horsiisee Bulaa Injiinar Alamuu Raggaasaa akka dubbatanitti, jireenya Horsiisee bulaa fooyyessuuf dhaqqabamummaan dhiheessii Bishaaniif  hojjetamaa jira.

Horsiisee bulaan nyaata Beelladaa cinaatti hojii Qonnaarratti hirmaachuun wabii nyaataasaa Mirkaneessuu  akka danda’uuf Pirojektii “Finnaa Oromiyaa”  jedhu bocee hojiirra oolchaa tureera jedhaniiru. 

Pirojektoota Finnaa 73 bara 2014 eegalaman keessaa 37 ijaarsisaanii xumuramee  tajaajila kennaa kan jiran yoo ta’u, pirojektoonni hafan immoo ijaarsarra jiru jedhaniiru. 

Pirojektota Kanaan hidhawwan Jallisii  xixiqqaa fi gidduugaleessi  baay’inaan hojjetamaa kan jiran yoo ta’u, Horsiisee bulaan hidhaawwan kana bishaan dhugaatii beelladaa fi  Misooma Qonnaaf  fayyadamaa jiraachuu ibsaniiru. 

Dabalataanis Hidhawwan xixiqqaa misooma nyaata beelladaaf oolchaa jiraachuun, Qonnaan Bulaan Misooma Beelladaarraa fayyadamaa ta’uu  eegaluu dubbataniiru. 

Kana qofa osoo hin ta’iin Horsiisee Bulaan sababoota adda addaan bu’uuraalee misoomaan duubatti hafee akka ture ibsuun, hojiin bu’uuraalee misoomaa guutuu bal’inaan hojjetamaa jiraachuu ibsaniiru. 

Bu’uuraalee misoomaa kannneen akka Daandii, Ibsaa, dhaabbile Fayyaa fi Manneen Barnootaa babal’isuun hojjetamuu ibsuun, kanaanis Horsiisee bulaan humna Hongee dandamachuusaa guddifachuun, omishaataa  ta’aa jira jedhaniiru.
 
Biirichatti Daarektarri   Bulchiinsa  Kontiraakteraa  Injiinar Tamasgeen Rundaasaa gamasaaniin, Naannichatti Bishaan lafa keessaa  fi lafaarraa sirnaan fayyadamuun  fayyadamummaa Horsiisee bulaa  guddisuuf  hojjetamaa  jiraachuu  ibsaniiru. 

Hidhawwan Jallisii Ijaarsarra jiran  saffisaan xumuruuf  hojiin eegalame  cimee itti fufa jedhaniiru.