Mootummaan Industiriiwwan Omishaaf xiyyeeffannoo kenneen  humni omisha Industiriiwwanii fi dandeettiin dorgomuu isaanii guddachaa jira 

Amajjii 7/2018(ENA)-Haala Mijataa Industiriiwwan Omishaaf uumuun humna omishaa guddisuurratti  bu’aan qabatamaan galmaa’uusaa  Ministirri Industirii Malaakuu Allabal ibsan.

 
Ministirichi haala sochii hojii Zoonii Dinagdee Addaa Idil -Addunyaa  Huwaajiiyaan  yeroo daawwatan akka ibsanitti, Industiriiwwan omishaaf haala mijataa uumuun cimee ittifufa. 

Humna omishaa industiriiwwan omishaa guddisuunii fi Industiriiwwan haarawwan gara hojiitti akka galaniif haalli mijataan uumamaa jira jedhaniiru. 

Hojiin Fedhii dhiheessii humnaa Idustirotaa guutuu hojjetamaa jiraachuu kaasuun, kunis Invastimantii damichaan jiru dabalaa akka dhufu dandeessisuu ibsaniiru. 

 

Mootummaan xiyyeeffannoo  Industiriiwwan omishaaf  kenneen  sharafa alaa damicharraa argamu guddachaa akka dhufu dandeessisuu hubachiisaniiru. 

 Fakkeenyaaf, Paarkii Industirii Hawaasaatti  omisha soolaariirratti gara hojiitti kan gale dhaabbanni Omisha Teekinoolojii Soolaarii Tooyoo  baatiiwwan ja’an darban  sharafa Alaa guddaa argamsiisuu  ibsaniiru. 

Zooniin Dinagdee Addaa Huwaajiiyaan omishawwan teekinooloojii gara Alaatti erguuf yaalii omisha eegaluun tarkaanfii guddaa ta’uu eeraniiru. 

Daawwannaan har’aa Zooniin Diinagdee addaa caalaatti bu’aa qabeessa akka  ta’uuf  kallattii kaa’uuf kan kaayyeffate ta’uu dubbataniiru.