Yunivarsiitichi Godina Harargee Bahaa fi Bulchiinsa Magaalaa Maayaaf sanyii filatamaa Qamadii deeggarsa  taasise

 Mudde 6/2018 (TOI)-Yuunivarsiitiin Haramaayaa Godina Harargee Bahaa fi Bulchiinsa Magaalaa Maayaaf sanyii filatamaa  Qamadii misooma jallisii Boneef oolu  deeggarsa  taasise.

Sanyii fooyya’aan kun dhukkubaa fi hongee dandamatee yeroo gabaabaatti kan gahu  ta’uu dubbataniiru. 
 Deeggarsicha itti aanaan pirezidaantii Qorannoo fi Hirmaannaa Hawaasaa Yuunvarsiitii Haramayaa Dr.Yisaaq Yusuuf  hoggantoota  Godina Harargee Bahaa fi  Bulchiinsa Magaala Maayaaf  kennaniiru.
 Deeggarsi Godinichaa fi  Bulchiinsa Magaalichaaf taassifame  sanyii fooyya’aa Qamadii  Kuntaala  600  ta’uu ibsaniiru. 
Moggaasa maqaa "Kiingi Bardi " jedhamu kan kennameef sanyiin Qamadiin fooyya’aan   hanqina roobaa dandamachuun  yeroo gabaabaatti  oomisha bu’aa qabeessa ta’uu  Dr. Yisaaq ibsaniiru. 

Deeggarsi sanyii filatamaa kun  Godinaa fi Bulchiinsa magaalichaatti  lafa heektaara 600 misoomsuun  oomisha  kuntaala kuma 18 walitti qabuuf  kan dandeessisuu fi Misooma Jallisii Bonee  naannichaaf  kan oolu  ta’uu dubbataniiru.  
Itti gaafatamaan waajjira Qonnaa Godina Harargee Bahaa Obbo  Abdii Ahimad  gamasaaniin ,misooma waktiiwwan Bonaa  bara Kanaan  misoomni Qamadii Jallisii  lafa heektaara   kuma 96 ol irratti   misooma. 
Sochii hojii  hanga ammaatti  lafti heektaarri  kuma 47 ol  qotamuusaa fi   lafti heektaarri  kuma 27 ol immoo hojiin  sanyii facaasuu  hojjetamuu   dubbataniiru. 

Deeggarsa Sanyii fooyya’aa Yuunivarsiitiin Haramayaa taasise oomishaa fi oomishtummaa Qamadii  Godinichatti guddisuuf   akka gargaaru ibsuun, deeggarsa taasifameefis galateeffataniiru.
Bulchiinsa magaalichaatti lafa heektaara 128 Qamadii Jallisii Boneen  misoomsuuf  qophiin xumuramuu itti Gaafatamaan   Waajjira Qonnaa Bulchiinsa Magaalaa Maayaa  Obbo Zallaqaa Abdataa ibsaniiru. 

Deeggarsa Sanyii fooyya’aa Qamadii Yuunivarsiitichi taasisee oomishtummaa Qamadii Qonnaan Bulaan eegale guddisuuf humna dabalataa akka ta’u  dubbataniiru.