Godina wallagga Lixaatti lafti  hektaarri kuma 20 ol qonna bonaan Kuduraan misoomaa jira

Sadaasa 27/2018(TOI)-Godina wallagga Lixaatti jallisii  qonna  bonaan  deeggaramuun lafa hektaara  kuma 20 ol irratti kuduraawwaniin misoomaa jiraachuu Waajjirri Qonnaa Godinichaa beeksise.

Waajjirichatti ogeessii  misooma Jallisii  Girmaa Jaalataa  TOI’f akka  ibsanitti,  Godinichatti omishaa fi Omishtummaa Qonnaan  Bulaa guddisuun wabiin nyaataa akka  mirkanaa’uuf misooma qonna gannaa cinaatti misooma jallisii Boneef xiyyeeffannoon kennameera.

Kanaanis  misooma jallisii bonee  bara Kanaan  lafa hektaara  kuma  20 fi  532  kuduraan misoomuu dubbataniiru.

Misoomni jallisii filannoowwan Bishaanii  fayyadamuun  qonnan  bulaan waaggaatti  yeroo lamaa fi  isaa ol akka  omishu  deeggarsii fi hordoffiin taasifamaa jiraachuu   kaasaniiru.

Jallisii Bonee  irraa caalaa Qullubbii  Diimaa, Timaatimii , raafuu  maraa, Qoosxaa, Qullubbii adii Kaarotii fi kanneen  biroon Misoomaa jiraachuu  eeruun kanarraas callaan  kuntaalli miiliyoona  3 tuqaa 4 ol walitti qabuuf karoorsuu eeraniiru.

Qonnaan bulaan kuma 134 ol Misooma kanarratti hirmaachaa jiraachuu ibsaniiru.

Misooma jallisii bonee guddisuuf dhiheessiin sanyii filatamaa fi Xaa’oo  yeroon qonnaan  bulaaf raabsamuu eeraniiru.

Misoomni jallisii  bonee  fayyadamummaa Dinagdee Qonnaan bulaa guddisuu fi sirna soorataa  akka  jijiiruuf isa fayyaduu kaasaniiru.

Boqqolloo qonna gannaan omishan walitti qabuun jallisii boneen Goommanaa fi hundee diimaa misoomasaa jiraachuu kan dubbatan immoo qonnaan  bulaa Gaarumaa Jaalataa ti.

Ammaan dura bokkaa eeganii omishuusaaniin  haalli jireenya isaanii nyaatanii buluurra  akka hin ceene  ibsuun , waggoota dhihooti asitti  garuu  jallisii fayyadamuun   waggaatti yeroo lamaa fi isaa ol omishuun wabii nyaataasaanii mirkaneessuu   dubbataniiru.

Qonnaan bulaan biroon Hundaa ol Hundumaa gamasaaniin, paampii bishaan harkisu waajjirri qonnaa mijeesseefiin fayyadamuun bishaan naannoosaanii jiru harkisuun   kuduraawwan  yeroo gabaabaatti gahan misoomsaa jiraachu dubbataniiru.

Jallisii bonee bara darbeen Kuduraawwan adda addaa omishuun nyaatarra darbee gabaaf dhiheessuun galii dabalataa argachuusanii ibsaniiru.

Kanaaf bara kana hojicha babal’isuuf gorsa ogeeyyii Qonnaa hojiirra oolchuun misooma jallisi boneen kaarotii fi  Raafuu maramaa misoomsaa  jiraachuu dubbataniiru.