Wal’aansa Bilisaa Moora Ijaa nuuf taasifameen Agartuun keenya deebi’uutti gammanneera

Sadaasa16/2018(TOI )- Hospitaala Nagallee Boranaatti wal’aansa bilisaa moora ijaa  taassifameefiin agartuunsaanii deebi’uusaan rakkoon guyya guyyaan isaan mudachaa ture akka  hir’ate wal’aanamtonni ibsan.

Garee tola ooltotaa hospitaala waliigalaa Aarbaa Minci tajaajila wal’aansa Moora  Ijaa  Hospitaala Nagallee Booranaatti eegaleera.

Godinichatti Jiraatan Aanaa Liiban Ganda Ardoot obbo Adam Bidoo, sababa dhibee moora ijaan  hojii fi jireenya hawaasummaarraa adda bahuun turuu yaadataniiru.

Wal’aansa argachuuf humna akka hin qabne kaasuun yeroo rakkatanii turanitti Hospitaalli Nagallee Booranaa  tajaajila wal’aansa bilisaa waan isaaniif kenneef gammadaniiru.

Tajaajilli wal’aansaa argatan rakkoo guyyaa  guyyaan isaan mudachaa ture akka irraa hir’isu abdii horataniiru.

Jiraataan magaalaa nagellee Boorana Haajii Abdul Qaadir Ibiraahim, sababa dhibee Moora ijaan arguu dadhabanii waggaa Afur dabarsuusaanii ibsaniiru.

Rakkoo ijaa isaan mudate yaalamuuf mana yaala dhiheenyasaanii jirutti yaalamanis fayyuu akka hin dandeenye eeruun  yeroo ammaa deeggarsa hospitaalichi taasiseen arguu danda’uusaanii dubbataniiru.

Wal’aansa ijaa Bilisaan Hospitaalichatti taassifameefiin fayyina argachuusaanii Aadde Ayyaalnesh Caannee dubbataniiru.

Tajaajila wal’aansaa taassifamefiin gargaarsa malee jireenyasaanii gaggeefachuu  danda’uusaaniif  miseensota garee wal’aansaa kana  galateeffataniiru.

Hospitaala Arbaa Minicitti dursaan garee wal’aansa moora ijaa bilisaa Obbo Dammaqaa Dabbabaa, doktaroota wal’aansa ijaa fi ogeeyyii fayyaa qabatanii Hospitaala Nagallee Boranaa dhufuusaanii ibsaniiru.

Hospitaala Nagallee Booranaatti tajaajila wal’aansaa bilisaa moora ijaa namoota 500’f kennuuf karoorsuusaanii ibsaniiru.

Hojii gaggeessaan walii galaa Hopitaala nagallee Booranaa  Bonayyaa  Liiban gamasaaniin, wal’aansa  moora ijaa  argachuuf godinaa fi aanaalee ollaarraa gara Hospitaala Nagallee Booranaatti akka dhufan ibsaniiru.

Wal’aansa bilisaa  baqaqsanii hodhuu cinaattis qulqullina dhuunfaa fi naannoo  eeguun dhukkuba ijaa ittisuun akka danda’amu hawaasaaf hubannaan  kennamuu  ibsaniiru.