Qulqullina Tajaajila fayyaa  eegsisuuf  dhaabbileen Barnota olaanoo hojii Qorannoorratti  xiyyeeffachuu qabu

Sadaasa15/2018(TOI )-Qulqullina tajaajila fayyaa eegsisuuf  dhaabbileen Barnota olaanoo hojii Qorannoorratti  xiyyeeffachuu  akka qaban Barsiisonni damee fayyaa hubachiisan. 
Waltajjiin marii  Kenninsa  Barnoota Fayyaa  Ammayyeessuun ogeeyyii  gahomani  horachuurratti xiyyeeffate magaala Ambootti gaggeeffameera.

 Waltajjii marii kanarratti kan hirmaatan Kolleejjii Fayyaa Yunvarsiisttii Ambootti Gargaaraan Piroofeesaraa  Muluu Kitaabaa, tajaajila fayyaa  Qulqullina qabu  hawaasaaf dhaqqabamaa taassisuuf  damichaan humna namaa gahoomee fi dorgomaa ta’e horachuun barbaachisaadha jedhaniiru. 

Hojiirra oolmaasaatiif qooda fudhattoota Dhaabbilee Barnoota Olaanoo waliin  qindoomuun humna namaa horachuuf hojii  qorannoo fi qo’annoo  qabatamaan deeggarame  hojjechuu akka qaban hubachiisaniiru. 
Kenninsa Barnoota fayyaa ammayyeessuun hojii fayyaa  dhukkuba ittisuu fi yaalanii fayyisuu  Mootummaan hojiirra oolche milkeessuuf bu’uura ta’uu dubbataniiru. 
Waltajjiin marii Qopheessummaa Yunvarsiitii Amboon  gaggeeffame qaama kanaa ta’uu eeruun Yunvarsiitiin Amboo gama Kanaan kenninsa Barnoota fayyaa qorannoo fi qo’annoon deeggaruun yericha wajjin wal-simsiisuurratti xiyyeeffannoon hojjechaa jiraachuu  hubachiisaniiru. 

Kessumaa Yunvarsiitiin Amboo, Yunvarsiitii Jimmaa fi  yuunvarsiitii Noorweey V.I.D. waliin  hojjechuun  barattoota damee fayyaa  Digirii 2ffaa fi 3ffaa  baratan hojii qorannoo fi qo’annoo gaggeessan rakkoo hawaasaa qabatamaan akka furaniif hojiin gorsaa waloon raawwatama jedhaniiru. 
Yunvarsiitii Kolleejjii fayyaa Jimmaatti Gargaaraan pirofeesaraa Abbabaa Abarraa gamasaaniin, Barnoota fayyaa bu’aa qabeessa  taassisuuf tumsi hayyootaa fi qooda fudhattootaa  murteessaa ta’uu ibsaniiru. 
Waltajjiin marii qopheessummaa Yunvarsiitii Amboon gaggeeffame kenninsa barnoota fayyaa qabatamaan deeggaruunii fi hojii qorannoo fi qo’annoo  sagantaa guutuun olitti  rakkoo hawaasaa kan furan yaada galtee  imaammataa  akka ta’aniif kan deeggaru ta’uu  eeraniiru. 

Barsiisaa fi qorataa  Yunvarsiitii  Noorweey  Dr.Tasfaayee Lataa kenninsa barnoota fayyaa  teekinooloojii Ammayyaa  yericha gituun deeggaruun kennamuun  ogeeyyii cimoo fi gahumsa qaban horachuuf akka deeggaru ibsaniiru. 
Kanaanis  tumsi  Yuunvarsiitonni  eegalan damicha fooyyessuun  gumaacha gaarii qabaata jedhaniiru.