Riijiniin Daldala Bilisaa Dorgommii Al-ergitootaa cimsa

Sadaasa10/2018(TOI)– Daldalli Ardii bilisaa riijinii bakka gahumsa  gabaa midhaan dheedhii fi zayitaa bal’isuun dorgommii Al-ergitootaa cimsuuf dandeessisa jechuun pirezidaantiin waldaa Al-ergitoota  midhaan dheedhii fi Zayitaa  Itiyoophiyaa  Obbo Ida’oo Abdii ibsan.

Itiyoophiyaan hojiirra oolmaa walii galtee daldala bilisaa Ardii Afriikaa Fulbaana 29 bara 2018  omisha ishee gara biyyoota Afriikaa adda addaatti erguun ifatti eegaluun ni yaadatama.

Itiyoophiyaan foon, kuduraa fi muduraa, buna, omisha midhaan dheedhii fi midhaan zayitaa   kaargoo daandii qilleensa Itiyoophiyaan, Geejiba lafarraan Keeniyaa, Somaaliyaa fi Afriikaa kibbaatti erguu eegalteetti.

pirezidaantiin waldaa Al-ergitoota  midhaan dheedhii fi Zayitaa Itiyoophiyaa Obbo Ida’oo Abdii daldalli ardii bilisaa Afriikaa faayidaa damichaaf qabu ilaalchisuun TOI waliin turtii taassisaniiru

Daldalli bilisaa Ardii Afrikaatti guddina  daldalaa bal’aa akka uumu ibsuun,  carraan kun keessumaa  omishtoota  midhaan dheedhii fi  zayitaa omishasaanii filannoo foyya’aan  gabaaf akka dhiheessa n gabaa haaraa fi bal’aa akka uumeef dubbataniiru.

Walii galtichi biyyoota Afriikaa gidduutti qaraxa daldalaa kaa’amani fi taarifa suuta suuta hanbisuun midhaan dheedhii fi zayitaa daldala Al-ergiif dhihatan gabaa Afriikaan dorgomaa akka ta’an dandessisa jedhaiiru.

Al-ergaan midhaan dheedhii fi zayitaa  Obbo Daanyaachoo Asaffaa gamasaanii, walii galtichi bakkeewwan gahinsa gabaa haaraa babal’isuunii fi dorgommii dabaluun hangaa fi galii  daldala AL-ergii Midhaan dheedhii fi Zayitaa guddisa jedhaniiru.

Walii galtichi hojiirra ooluun daddabarsa daldala Afriikaa kan jijjiirudha kan jedhan immoo  bakka bu’aa biyyoolessaa  waldaa sanyii saliixii Naayijeeriyaa Iyyaasuu  Yisihaaqidha.