Ijaaramuun warshaichaa omishaa fi omishtummaa guddisuun wabii nyaataa mirkaneessuuf ni gargaara – korporeeshinicha

Onkoloolessa 26/2018(TOI)-Warshaan Xaa’oo Yuuriyaa ijaaramuun omishaa fi omishtummaa guddisuun  wabii nyaataa mirkaneessuuf tattaaffii  taassifamu  akka deeggaru  Korporeeshiniin Hojii  Qonna Itiyoophiyaa ibse.

Waarshaan xaa’oo Yuuriyaa biyya keessatti ijaaramuun  faayidaa hedduu qabaachuu  hojii gaggeessaan hooggansa hojii komunikeeshinii fi itti gaafatama hawaasummaa Gaashawu Ayichiluum ibsan. 

Bu’uuruma Kanaan ammaan dura rakkoowwan Xaa’oo Yuuriyaan yeroon, fageenyaan, gatiin, qulqullinaanii fi kanneen biroon dhiheessuurratti turan akka hanbisu ibsaniiru.

Akkasumas qonnaan bulaa fi  dureeyyiin damee Qonnaarratti bobba’an dabalaa dhufuun fedhiin  xaa’oo  Yuuriyaa guutuuf akka deeggaru TOI’f ibsaniiru.

Gama biroon sharafa alaa bittaa xa’oo Yuuriyaaf bahaa ture akka oolchu eeraniiru.

Damee Qonnaa caalaatti guddisuun  omisha qonnaa gara alaatti ergaman bal’inaan omishuu  akka dandeessisu ibsuun, Kanaan kan wal-qabate damee qonnaan  dandeettii dorgommii gabaa alaa  Sadarkaa Olaanaan  guddisa jedhaniru.

Xaa’oon Yuuriyaa yeroo barbaadamutti gatii fi hanga barbaadame  dhiheenyatti argachuu dandeessisuun bu’aa biroo ta’uu eeraniiru.

Ijaaramuun warshichaa carraa hojii bal’aa uumuu fi cehumsa teekinooloojii fiduuf ni gargara jedhaniiru.

Ministirri Muummee Dr. Abiyyi Ahimad Fulbaana 22 bara 2018  Invastimanti holdingii Itiyoophiyaa, daangootee giruuppii waliin wal tumsuun waarshaa xaa’oo Yuuriyaa Ijaaramuuf dhgaa bu’uuraa ka’uunsaanii ni yaadatama. 

Baatii 40 keessatti ijaaramee akka xumuramu kan eerame waarshaan kun  waggaatti xaa’oo toonii  miiliyoona 3 omishuuf humna akka qabu ibsaeera.