Itiyoophiyaan Galaana Diimaa akka  hin fayyadamne seerri dhorku hin jiru

Onkoloolessa 25/2018(TOI)- Itiyoophiyaan Galaana Diimaa akka  hin fayyadamne  seerri dhorku  hanga hin  jirretti  Galaana diimaa fayyadamuuf gaaffii kaasuunshee bu’uura seeraa qabaachuun ibsame.

Yunvarsiisii Asoosaatti Barsiisaa fi qorataan Seeraa Kidaanee Dayyaasaa TOI waliin turtii taassisan, Itiyoophiyaan ulaa galaanaa  argachuuf adeemsa taassisaa jirtu  gama seeraan dhiheenyatti hordofaa akka jiran  kaasaniiru.

Bu’uuruma Kanaan  balbala Galaanaa kan dhabde Itiyoophiyaan  haala seera galaanaa idil-Addunyaan bakka gahumsa galaanaa Argachuuf mirga akka qabdu eeruun, Itiyoophiyaan  Galaana diimaa akka hin fayyadamne seerri ishee dhorku hin jiru  jedhaniiru.

Itiyoophiyaan itti fayyadamaa kan turte buufanni Asab walii galtee Aljeersirratti illee maal ta’uu akka qabu  ifatti kan kaa’ame akka  hin jirre  hubachiisaniiru.

Walii galteen Aljeersi yeroo mallattaa’us daangaa  biyyittiin naaf mala jettu qofaarratti akka xiyyeefate kaasaniiru.

Kanaaf Buufata Asabii fi Galaana Diimaa Eertiraan kiyya jettee akka fayyadamtuu fi Itiyoophiyaan akka itti hin fayyadamne jedhamtee dhorkamtu bu’uurri seeraa dhorku akka hin jirre mirkaneessaniiru.

Gama biroon daldala Idil Addunyaa Dabalatee  seera Galaanaa Idil- Addunyaan Galaanaa guddaa kan jedhamu qabeenya hundaa jedhamuu eeruun, qabeenya kana fayyadamuuf  balballi galaanaa dirqama barbaachisaadha jedhaniiru.

Kanaaf Itiyoophiyaan filannoo Kanaan mirga Galaana diimaa fayyaadamuu akka qabdu dagachuu hin qabnu jedhaniiru.

Walii gala bu’uura qabxii armaan olitti ibsamaniin gaffii Itiyoophiyaan ulaa Galaanaa  argachuuf kaaste  bu’uura seera idil addunya kan qabu ta’uu cimsanii ibsaniiru.

Buufata Asab Itiyoophiyaan itti fayyadamaa turtee fi Galaana Diimaan gara Ertiraatti akka hammatamu haalli itti taassifame ragaan akka  hin jirre Ministirri Muummee Dr.Abiyyi Ahimad dhiyeenya kana kan gaggeeffame walga’ii mana maree bakka bu’oota ummataa irratti  ibsaniiru,

Waliigala Itiyoophiyaan haala Dinagdee qabduun, baay’ina uummataa fi  guddina damdaneessaan  daldala alaa galuu fi Al-ergeef  ulaan galaanaa akka ishee barbaachisu hubachiisaniiru.