Godina Wallagga lixaatti Qonnaan Bultoonni muduraalee Sanyii fooya’aa fayyadaman bu’aa qabeessa ta’aniiru

Onkoloolessa 19/2018(TOI)- Godina wallaga lixaa Qonnaan Bultoonni muduraalee sanyii foyya’oo  gidduugala Qorannoorraa bahan fayyadaman misoomicharraa galii fooya’aa argachuun  fayyadamoo ta’aa dhufuusaanii dubbataniiru.

Qonnaan Bultoonni Misooma muduraarratti bobba’an TOI’f yaada kennaniin akka ibsanitti,  sanyii foyya’aa Mootummaarraa argatan misoomsuun galii argatanii jireenya fooya’aa gaggeeffachuu eegaluusaanii dubbataniiru.

 Qonnaan bultoota  Sanyiiwwan fooya’aa kana fayyadaman keessaa Godinichatti jiraataan Aanaa hoomaa obboTakkaaleny Efireem, ammaan dura misooma bunaarratti qofa hirkatanii  turuusaanii dubbataniiru.

Yeroo dhihootii asitti  deeggarsa ogeeyyii Qonnaan  fuduraalee sanyii fooya’oo   fayyadamuun misuumsuusaanin bu’aa qabeessa ta’uu danda’uusanii ibsaniiru.

Avocaadoo fi Muuzii misoomsuun waggaatti galii hanga birrii kuma 25 argachuusaanii kaasuun kanaanis jireenyasaanii karaa fooya’een gaggeeffachuusaanii dubbataniiru.

Jiraataan Aanaa Laaloo Assaabii  Qonnaan bulaa Garramoo Jireenyaa gamasaaniin  sanyii filatamaa Muuzii Gidduugala Qorannoo Qonnaarraa bahe misoomsuun Dinagdeensaanii guddachaa jiraachuu dubbataniiru.

Fuuldurattis misoomicha cimsuun sanyii muuzii baay’isuunii fi misoomsuun  fayyidaa argatan caalaatti guddisuuf cimanii akka hojjetan  eeraniiru.

Waajjira Qonnaa Godina wallaga lixaatti ogeessi muduraalee obbo Jibiriil Mangee akka ibsanitti  Godinichatti Aanaawwan hundatti misoomni muduraalee bal’inaan gaggeeffamaa jira.  

Sochii hanga ammaa jiruun lafa hektaara  kuma 40 fi 381 muduraalee sanyiin isaanii fooya’e  kilaastaraan misoomaa jiraachuu ibsuun Qonnaan bultoonni kuma 62 ol  misoomicharratti hirmaachuusaanii dubbataniiru.

Waggaa darbe sanyiiwwan fooya’oo gidduugala Qonnaarraa  bahanii fi yeroo gabaabaa keessatti omisha hedduu fi qulqulluu kan kennan Muuzii, Avokadoo Paappayaa fi  muduraalee biroon Qonnaan  bulaaf qaqqabamuusaanii dubbataniiru.

Misooma muduraalee raawwatamaa jiran  irraa omishni Kuntaalli  Miiliyoona 291 ol  waggaa waggaan walitti qabamaa jiraachuu hubachiisaniiru.

Qonnaan Bulaan omisha  marsaa tokkoon giddugaleessaan galii birrii kuma 30 hanga 50  argachaa jiraachuu eeruun, akka fakkeenyaatti bara omishaa qabame  firii kennuu kan eegale  Avookaadoo “hash” jedhamerraa kuntaala 76 gabaaf dhiheessuus danda’uusaanii  dubbataniiru.