Duudhaalee Aadaa Dinqisiisoo Itiyoophiyaan qabdu keessaa tokko kan ta’e Irreechi ayyaana Walooma  cimsudha

Fulbaana 23/2018(TOI)-Duudhaalee Aadaa dinqisiisoo Itiyoophiyaan qabdu  keessaa  tokko kan ta’e Irreechi ayyaana Walooma  cimsu ta’uu  Itti gaafatamtuun Biiroo Aadaa fi Turiizimii Naannoo Oromiyaa Jamiilaa  Simbiruu  ibsan.

Fooramiin Irreechaa 7ffaan  Mataduree “ Irreechi Bayyanachuu Biyyaaf”  jedhuun   magaalaa Bishooftuu  galma Hora Harsadeetti gaggeeffamaa jira.

Pirezidaantiin Naannoo Oromiyaa Shimallis Abdiisaa , mana maree bakka bu’oota ummataatti  Itti waamamaan Mootummaa Dr. Tasfaayee Beeljigee, Af-yaa’ii  Caffee Oromiyaa Sa’aadaa Abdurahimaan, Ministiroonni,  Qondaaltonni Olaanoo Federaalaa fi Naannichaa, Abbootiin Gadaa, Haadholiin Siinqee fi keessummooni Waamichi taassifameef foramicharratti argamaniiru.

Saganticharratti Itti Gaafatamtuun Biiroo Aadaa fi Turizimii Oromiyaa Jamiilaa Simbiruu,   Duudhaalee Aadaa dinqisiisoo Itiyoophiyaan qabdu keessaa Ayyaanni Irreechaa ayyaana Walooma cimsudha jedhaniiru.

Irreechi Nagaa fi Galanni, dhiifamni, Waloomni, Obbolummaan Kan itti calaqqisu  Duudhaa aadaa Miidhagaa ofkeessatti hammate ta’uu dubbataniiru.

Irreechi ibsituu Sirna Gadaa keessa tokko ta’uu ibsuun, ummanni Oromoo Addunyaaf kan gumaache  Qabeenya Aadaa  Itiyoophiyaa dinqisiisaadha jedhaniiru.

Biirichi Qabeenya Aadaa Naannichaa sadarkaa olaanaan beeksisuu fi  kunuunfamanii akka fulla’an hojjechaa jiraachuu ibsaniiru.

Fakkeenyaaf sirna Gadaa keessaa kan bahe Manni Murtii Aadaa, ibsituu  Aadaa wal-gargaarsaa kan ta’e Buusaa Gonofaan  kan fakkaatan  duudhaalee aadaa  hojiin kunuunsuu fi  eeguuf hojjetamaa jira jedhaniiru.

Irreecha bakka Hawwata Turiizimii olaanaa gochuuf madda guddina galii biyyaaf qoodasaa akka  bahuuf hojiin itti fufinsa qabu hojjetamaa jiraachuu ibsaniiru.

Kantiibaan Magaalaa Bishooftuu  Alamaayyoo Asaffaa gamasaanin, magaalittiin gidduugala Aadaa fi Turiizimii ta’uushee eeruun, Irreechi Miidhagina Bishooftuu ta’eera jedhaniiru.

Gidduu galeessummaa Turizimiishee cimsuuf pirojektoonni adda addaa hojjetamaa jiraachuu ibsaniiru.

Ayyaanni Irreechaa bara kanaa booru  Fulbaana 24 bara 2018 Magaalaa Finfinnee Hora Finfinneetti, akkasumas  Dilbata Fulbaana 25 Bishoftuu Hora Harsadeetti mataduree  “Irreechi Bayyanachuu biyyaaf ” jedhuun  kabajama.