Naannoo Oromiyaatti ganni bahuu hordofee tamsa’inni dhibee busaa akka hin babal’anneef  tattaaffiin adda addaa taassifamaa jira

Fulbaana 06/2018(TOI )-Naannoo Oromiyaatti  ganni bahuu hordofee  tamsa’inni  dhibee busaa akka hin babal’anneef hojiin  adda addaa raawwatamaa jiraachuu Biiroon Fayyaa Naannichaa Beeksise.

Naannichatti yeroo  ammaa marsaa jalqabaan Agobara Siree miiliyoona 1tuqaa 6 uummataaf raabsamuun himameera.

Itti Aanaan Biiroo Fayyaa Oromiyaa Dr.Tasfaayee Kabbabaaw TOI’f akka ibsanitti, dhibee busaa Ittisuu fi to’achuuf  hojiin bal’aan  ojjetamaa jira.

Dhibee Busaa Ittisuu fi to’achuuf tattaaffii taassifamuun hawaasnii fi dargaggoonni tola ooltonni hirmaannaa qindaa’aa taassisaa jirachuu  ibsaniiru.

Keessumaa bookee busaa to’achuuf hawaasa hirmachisuun bakkeewwan wal-hormaata Bookee Busaaf Mijataa ta’an, bakkeewwan bishaan kuufatan yaasuunii fi  hojiin qulqullinaa hojjetamaa jiraachuu ibsaniiru.

 Hojii to’annaa bookee busaa  tajaajila lammummaa fayyadamuun xiyyeffannoon  addaa itti kennamuu dubbataniiru.

Gama Kanaan tola ooltota hirmaachisuun manaa manatti hojii  sakatta’insa bookee busaa taassisuun namoota mallattoon irratti argame gara dhaabilee fayyaa akka deeman  taassifamaa jiraachuu dubbataniiru. 

Hojiin tooftaa Ittisa dhibee Busaa barsiisuu dhaabbilee fayyaatti, naannoowwan uummanni itti walitti qabamanittii fi manaa manatti dabalatee raawwatamuusaa ibsaniiru.

Bakkeewwan filatamanitti Hojiin Keemikaala Biifuu akka raawwatamu ibsuun, hanga ammaatti Godinaalee  Iluu Abbaaboor, Wallagga lixaa, fi  Qeellam wallagaa hojiin manaa manatti keemikaala Biifuu raawwatamuu  ibsaniiru.

Akkasumsa Marsaa Jalqabaan Agobora Siree miiliyoona 1 tuqaa 6 hawaasaaf raabsamuu ibsuun, hojiiwwan kun cimanii itti fufu jedhaniiru.

Waqtiin gannaa bahu hordofee  dhibee busaa uumamuu danda’u  ittisuu fi to’achuuf  yeroo dhihootti agobora siree miiliyona tokkotti dhihaatu rabsuuf karoorfamuu beeksisaniiru.