Itiyoophiyaan sirna bulchiinsaa fi dhabamsiisa balfa gogaa ammayyaa hojiirra ni’oolchiti

Hagayya 22/2017(TOI)- Itiyoophiyaan sirna bulchiinsaa fi dhabamsiisa balfa gogaa seerota idil addunyaa waliin walsimuu fi ammayyaa hojiirra akka oolchitu daarektarri olaanaa abbaa taayitaa eegumsa naannoo Itiyoophiyaa Injiinar Lalisee Namee ibsan.

Injiinar Laliseen akka ibsanitti, labsiin oomishoota pilaastikaa altokko qofa fayyadan dhorku baatii jaha booda hojiirra ni’oola.

Lakkoofsi labsii bulchiinsaa fi dhabamsiisa balfa gogaa 1383/2017 mana maree bakka bu’oota ummataan mirkanaa’uunsaa niyaadatama.

Daarektarri olaanaa haala llabsiin kun hojiirra oolu irratti abbaan taayitichaa waltajjii leenjii qooda fudhattootaaf kennamaa jirurratti akka ibsanitti, dhimmoota gurguddoo labsichi qabate keessaa sirni bulchiinsaa fi dhabamsiisa balfa gogaa keessatti argama.

Itiyoophiyaan labsii bulchiinsaa fi dhabamsiisuu balfa gogaa ammayyaa seerota idiil addunyaan walsimu qopheessuushee ibsaniiru.

Akkaataa labsii kanaatiin pilaastikiiwwan al tookko qofa fayyadan biyya keessa galchuun, oomishuu fi gabaaf dhiheessuun akka hindanda’amne dubbataniiru.

Kunis baatii jaha booda guutuu biyyaatti hojiirra akka oolu dubbataniiru.

Oomishoota naannawarrattis ta’e namarratti miidhaa hingeessifne dhiheessuuf ministeera industirii fi damee oomishtootaa waliin hojjetamaa akka jiru himaiiru.

Leenjiin har’aas labsichi sirnaan hojiirra akka oolu qooda fudhattoonni hubannoo akka argatan gochuuf kan akeekame ta’uu dubbataniiru.

Itiyoophiyaa qulqulluu dhaloota dhufuuf dabarsuun ittigaafatama hundaa ta’uu beeksisaniiru.