Pirojektiin ijaarsa warshaa xaa’oo gudina dinagdee Itiyoophiyaa nisaffisiisa-Ministira maallaqaa Ahimad Shidee

Hagayya 22/2017(TOI)- Pirojektiin ijaarsa warshaa xaa’oo gudina dinagdee Itiyoophiyaa saffisiisuuf qooda guddaa akka qabaatu Ministirri maallaqaa Ahimad Shidee ibsan.

Itiyoophiyaa Invastimant hooldiing fi gareen Daangootee bakka ministirri muummee Dr. Abiyi Ahimad argamanitti pirojektii warshaa xaa’oo doolaara biiliyoona  2 tuqaa 5niin ijaaramuuf waliigaltee mallatteessaniiru.

Ministirri muummee Dr. Abiyyi Ahimad ergaa fuula marsariitii isaaniirratti barreessaniin, imala gara wabii nyaataa fi cehumsa qonnaatti taasifnuuf boqonnaa biraarra gahuu keenyaafItiyoophiyaanonni hundi baga gammanne jechuun ibsaniiru.

Waliigalteen ijaarsaa kun damee qonnaa deeggaruuf qooda olaanaa akka qabaatu Ministirri maallaqaa Ahimad Shidee dubbataniiru.

Xaa’oo Itiyoophiyaan baasii guuddaan galchitu oolchuun sharafa alaa hambisuuf gumaacha olaanaa baha jedhaniiru.

Misooma qonnaa, Industirii fi albuudaa deeggaruun qooda guddaa akka qabaatu ibsaniiru.

Guddina dinagdee Itiyoophiyaa saffisiisuun, carraa hojii uumuu fi misooma bakka warshichi itti ijaaramuu dadammaqsuuf faayidaa olaanaa akka qbau dubbataniiru.

Waliigalteen kun Itiyoophiyaanotaaf gammachuu jala bultii bara haaraati jechuun ibsaniiru.

Hidhi haaromsaa Itiyoophiyaa dhiheenya akka eebbifamu kan eeran ministirichi, warshaan xaa’oo kun akka hidha haaromsaa guddicha biraatti akka fudhatamu dubbataniiru.

Warshichi Itiyoophiyaa wiirtuu riijinichaa dhiheessii xaa’oo akka ishee taasisus ibsaniiru.