Godina Baaleetti fayyadama dinagdee qonnaan bulaa guddisuuf hojiin misooma bunaa hojjetamaa jira

Hagayya 22/2017 (TO)- Godina Baaleetti fayyadama dinagdee qonnaan bulaa caalaatti guddisuuf hojjetamaa jiraachuu waajjirri qonnaa godinichaa beeksise.

Misoomaa fi oomishtummaa Bunaa guddisuuf galma qabameen biqiltuuwwan bunaa fooyya’an miiliyoona 34 tuqaa 9 aanaalee godinichaa shan keessatti dhaabamanii kunuunfamaa akka jiran himameera.

Fayyadama dinagdee qonnaan bulaa godinichaa qonna bunaa babal’isuuf hojjetamaa jiraachuu Itti aanaan hoogganaa waajjira qonnaa godina Baalee obo Geetaachoo Abbabaa ibsaniiru.

Biqiltuun bunaa lafa haaraa heektaara kuma 5 irratti kan dhaabame yoo ta’u oomishni Kanaan dura heektaararraa kuntaala shan hincaalle dachaan akka guddisu dubbataniiru.

Baranaa qofa Bunni kuntaala kuma 376 fi 400 oomishamuu kaasaniiru.

Qulqullina Bunaa eegsisuuf leenjii gabbisa dandeettii kennamu cinaatti Omishtoota bunaaf shiboo bunni irratti gogu meetir kuubii kuma 435 kennamuu ibsaniiru.

Qonnaan bultoota godinicha aanaa Gurradaamoo buna oomishan keessaa Huseen Umar yaada kennanniin misoomni bunaa lafa xiqqaarratti eegalan bu’a qabeessa waan ta’eef babal’isaa akka jiran dubbataniiru.

Gorsa ogeeyyota qonnaa dhagahuun Buna dhaaban xaa’oo uumamaa fayyadamuun kunuunsaa waan jiraniif waggaa sadii booda bu’aa gaarii akka eegan kan dubbatan ammoo qonnaan bulaa aanichaa Ahimad Badriiti.

Godina Baaleetti lafti heektaara kuma 68 caalu bunaan qabamuun ibsameera.