Itiyoophiyaa fi Kolombiyaan hariiroo gamlamee cimsuuf kutannoo waloo qaban ibsan

Hagayya  21/2017 (TOI)-De’eetaan ministiraa dhimma alaa ambaasaaddar Hadaraa Abarraa itti aanaa ministira dhimma alaa Kolombiyaa Mawuriisiiyoo Jaramiiloo Jaasiirni hr’a waajjirasaaniitti simatanii haasofsiisaniiru.

Mariin taasisan hariiroo biyyoota lamaanii cimsuu irratti kan xiyyeeffatedha.

Oomishtummaa guddisuuf dameelee ijoo keessumaa tumsa industirii bunaan jiru guddisuun barbaachisaa ta’uu ambaasaaddar Hadaraan kaasaniiru.

Daldalaa fi invastimantii, kalaqaa fi waljijjiirraa teeknooloojii, humna haaromfamaa fi albuuda dabalatee dameelee tumsaa haaraa ilaaluun akka barbaachisus ibsaniiru.

Fuulduras tumsa  dameelee aviyeeshinii fi barnootaan jiru bal’isuuf hojjechuun akka barbaachisu de’eetaan ministiraa kun himaniiru.

Itti aanaa ministira dhimma alaa Kolombiyaa Jaramiiloo Jasiir gamasaaniin, Kolombiyaan hariiroo Itiyoophiyaa waliin qabdu cimsuuf fedhii guddaa akka qabdu ibsanii, Itiyoophiyaan hirmaattuu olaanaa riijinichaa ta’uushee dubbataniiru.

Kolombiyaan tumsa waltajjiiwwan biyyoota hedduu cimsuuf kutannoo akka qabdu ibsuusaanii odeeffannoon ministeera dhimma alaa nimul’isa.