Hidhii haaromsaa Itiyoophiyaa guddichi gamtoominni, gootummaa fi miirri nidanda’ama jedhu kan itti mirkanaa’edha

Hagayya 20/2017(TOI)- Hidhii haaromsaa Itiyoophiyaa guddichi gamtoominni, kutannoon, gootummaa fi miirri nidanda’ama jedhu kan itti mirkanaa’e ta’uu waajjirri qindeessaa pirojektii hidha haaromsaa beeksise.

Waajjirichi Yuunivarsiitii Salaalee waliim qindaa’uun mata duree “misooma sululaa Abbaayyiif karoora tokko gabaasa tokko” jedhuun bakka hooggantoonni dhaabbilee barnootaa laanoo fi qooda fudhattoonni argamanitti waltajjii maree gaggeessaa jira.

Hojii raawwachiisaa olaanaan waajjirichaa Dr. Aragaawii Barhee wayita kana, hidhi haaromsaa Itiyoophiyaa guddichi dandeettii keenyaan galmoota biyyaalessaa milkeessuu akka dandeenyu addunyaaf  kan agarsiifnedha jedhaniiru.

Hidhi haaromsaa gufuu hedduu keessa darbee tumsa Itiyoophiyaanotaan eebbaaf qophaa’uusaa eeraniiru.

Akkuma hidha haaromsaa waliin ijaarre dalaliin akka hinguutamne hojiin misooma sululaa waloomaa fi eegumsa naannoo irratti hojjetamaa jiru cimee ittifufuu akka qabu kaasanii, dhaabbileen barnootaa olaanoos qorannoo fi qu’annoon deeggaruu qabu jedhaniiru.

Pirezidaantiin Yuunivarsiitii Salaalee Dr. Fayyeeraa Dhinsaa gamasaaniin, Hidhi haaromsaa imala Itiyoophiyaan walabummaa dinagdee mirkaneessuuf jalqabde kan milkeessu bu’ura misoomaa guddaa ta’uu eeraniiru.

Yuunivarsiitichi hidha haaromsaa dalaliirraa eeguuf hojjechaa jiraachuu ibsanii, biqiltuuwwan mandhalee leemmana gammoojjii fi kanneen biroo bakkeewwan sululichaatti hawaasa waliin ta’uun dhaabaa akka jiru dubbataniiru.

Hojiilee Jijjiirama haala qilleensaa damdamachuufhojiin hojjetamu cimee akka ittifufu ibsaniiru.