Hojmaattonni sirna kaffaltii gibiraa si’oomsuuf kaa’aman dandeettii gibira walitti qabuu fooyyessaniiru

Hagayya 16/2017 (TOI)-Hojmaattonni sirna kaffaltii gibiraa ariifataa, si’oomaa fi haqa qabeessa gochuuf dandeettiin gibira walitti qabuu akka fooyya’u gochuusaa biiroon galiiwwanii Finfinnee beeksise.

Tajaajilamtoonni akka jedhanitti, sirni gibirri itti kaffalamu ariifataa, si’ataa akkasuma yeroo kan qusatuu fi filatamaadha.

Daarektarri komunikeeshinii biirichaa Sawunnat Ayyalaa TOI’f akka ibsanitti, galii bara bajataa 2018 walitti qabuuf karoorfame milkeessuuf tajaajilli teknooloojiin kennamaa jira.

Biirichi sirnoota hojmaataa  haaraa teeknooloojiin deggaraman 24 ta’an hojii jalqabsiisuu kaasaniiru.

Sirni hojmaataa kun kafaltoonni gibiraa bakka jiranirraa gibira beeksisuu fi kaffaluu akka danda’u akkasumas komii yoo qabaate karraa itti dhiheeffatu haala mijataa kan uumu ta’uu eeraniiru.

Akkasumas teeknooloojiin jiddugaleessa irraa kenniinsa tajaajilaa dameelee hundaa hordofuuf kan gargaaru hojiirra ooluu ibsaniiru.

Hojmaattonni sirna kaffaltii gibiraa ariifataa, si’oomaa fi haqa qabeessa gochuuf dandeettii gibira walitti qabuu biirichaa akka fooyya’u gochuusaanii darektarichi dubbataniiru.

Haala Kanaan bara bajataa 2018 baatii Adoolessaa qofa galii birrii biiliyoona 26 tuqaa 54 walitti qabuuf karoorfamuu yaadachiisanii, birrii biiliyoona 26 tuqaa 2 walitti qabamuu  dubbataniiru.

Biiroo galiiwwanii bulchiinsa magaalaa Finfinnee bakka buutuun garee e-faayiliingii Makkiyaa Sayid gamasaaniin, sirni onlaayinii gibira beeksisuu fi kaffaluu muddama darabee eeguun uumamu kan hambisudha jedhaniiru.

Kaffalaan gibiraa bakka barbaaderraa gibira beeksisuu fi kaffaluu waan danda’uuf tajaajilaafis ta’e tajaajilamaaf faayidaa olaanaa akka qabu eeraniiru.

Karaa onlaayinii gibira kan kaffalaan Jamaal Kadir akka ibsanitti, sirni hojmaataa kun kaffalaan gibiraa teeknooloojiin akka wal baru gochuun tajaajila si’ataa akka argatu nigargaara jedhaniiru.

Kaffalaan gibiraa Abdulahimad Musxafaa yaada kenneen, sirna hojmaataa mana teenyee tajaajila ittiin argannu waan ta’eef faayidaansaa olaanaadha jedhaniiru.

Sirnichi tajaajila ariifataa fi si’ataa kennuun yeroo waan qusatuuf filatamaa akka isa taasisu eeraniiru.