Fedhii Itiyoophiyaan ulaa galaanaaf qabdu karaa dijitaal dippilomaasii hawaasa addunyaf hubachiisuun nibarbaachisa

Hagayya 10/2017(TOI)-Fedhii haqa qabeessa Itiyoophiyaan ulaa galaanaaf qabdu karaa dijitaal dippilomaasii hawaasa addunyaf hubachiisuun akka barbaachisu daarektarri inistiitiyuutii dhimma alaa Jaafaar Badruu ibsan.

Itiyoophiyaan hidha haaromsaa isheerra darbee riijinicha dinagdeen walitti hidhuu danda’u quulqullinaan ijaartee xumurteetti.

Hidhi haaromsaa pirojektii guddaa dinagdee Itiyoophiyaa guddisu riijinicha anniisaan walitti hidhi, fayyadama haqa qabeessa biyyoota gara gadii kan hinmiinedha.

Daarektarri olaanaa inistiitiyuutii dhimma alaa Jaafaar Badruu TOI’f akka ibsanitti, fedhii Ityoophiyaan ulaa galaanaaf qabdu karaa dijitaal dippilomasii hawaasa addunyaaf hubachiisuun nibarbaachisa.

Akkasumas humnoota fedhiishee biyyaalessaa morman karaa dijitaal dippilomaasii qolachuun akka barbaachisu dubbataniiru.

Itiyoophiyaan kanneen biroo osoo hinmiidhiin faayidaa biyyaalessaashee kabachiisuuf tattaaffii itti jirtu humnoonni karaa malee ololan akka jiran eeranii, dhugaa jiru karaa sirrii ta’e hubachiisaa ilaalcha dogoggore qolachuu akka barbaachisu hubachiisaniiru.

Itiyoophiyaan hidha haaromsaa guddicha xumuruun gamatti fedhii ulaa galaanaaf qabdu addunyaaf hubachiisuuf ajandaa haaraa qabattee dhihaachuushee ibsaniiru.

Dhimmi ulaa galaanaa ajandaa ukkaamfamee turedha kan jedhan daarektarri olaanaa kun, diinonni Itiyoophiyaa milkaa’ina dippilomaasii waltajjiiwwan gamlamee fi gama hedduurratti addunyaarratti galmeessifte akka hin mul’anne kan taassu seenessa sobaa ta’uu dubbataniiru.

Kanaaf lammiileen ambaasaaddara biyyasaanii ta’uun karaa dijitaal dippilomaasii fedhii gaarii Itiyoophiyaa hawaasa addunyaaf hubachiisuu, barsiisuu fi beeksisuu qabu jedhaniiru.