Jijjiirama Ardii fi fayyadama lammiileef waliin hojjechuuf yaa’ii paartilee siyaasaa Afriikaarratti waliigalameera-Dr. Biqilaa Hurrisaa

Hagayya 09/2017(TOI)- Jijjiirama Ardii, fayyadama lammiilee fi ijaarsa mootummaaf waliin hojjechuuf yaa’ii paartilee siyaasaa Afriikaa 12ffaarratti waliigalamuu hoogganaan damee hariiroo idil addunyaa fi ummataa Dr. Biqilaa Hurrisaa ibsan.

Doktar Biqilaa Hurrisaa yaa’ii paartilee siyaasaa Afriikaa 12ffaa mata duree Siyaasarraa amma badhaadhinaatti” jedhuun Gaanaa Akraatti gaggeeffame ilaalchisuun TOI waliin turtii taasisaniiru.

Mariin Paartilee siyaasaa Afriikaa jidduutti tumsa cimsuu fi qindoominni paartilee guddina Ardiif abdii ta’u dhugoomsuuf akeekkate yaa’icharratti gaggeeffamuu dubbataniiru.

Yaa’iin kun paartileen siyaasaa badhaadhina hundagaleessa lammiilee mirkaneessuurratti xiyyeeffachuusaa ibsaniiru.

Paartileen cehumsa dinagdee, ijaara nageenyaa fulla’aa fi ijaarsa mootummaa mirkaneessuuf xiyyeeffannoon hojjechuu akka qaban waliigalteerra gahamuu ibsaniiru.

Kun ammoo Afriikaa cimtuu ijaaruuf bu’ura kan kaa’u ta’uu eeraniiru.

Siyaasa Afriikaa wal amantaa dhabuu fi adeemsa shakkii keessaa baasuun tumsa ajandaawwan Ardii waloorratti ashaaraa kaa’uuf gargaaru cimsuun akka barbaachisu kaasaniiru.

Itti aanaan pirezidaantii paartii badhaadhinaa Adam Faaraah yaa’icharratti dubbii dubbataniin, paartileen siyaasaa Afriikaa guddina hundagaleessa biyyaa fi Ardiif xiyyeeffannoo taasisuu akka qaban ibsuusaanii kaasaniiru.

Paartileen sochii dhuunfaan taasisaniin alatti wal’amanuu, waliin tumsuu fi waliigaltee uumanii hojjechuu akka qaban ibsaniiru.

Paartileen siyaasaa ijaarsa biyyaa fi Ardii cimaa, fudhatama mootummaa fi ijaarsa aadaa siyaasaa demokiraatawaa fi tasgabbaa’aa  xiyyeeffannoo guddaa kennuun hojjechuu akka qaban waliigalamuu dubbataniiru.

Paartileen riifoormii keessoo taasisuun ijaarsa nageenya fulla’aaf ashaaraasaanii kaa’uu akka qaban waliigalamuu eeraniiru.