Deeggarsa Ijaarsa Hidha Haaromsa Itiyophiyaa guddichaaf taassisnu cimsinee Itti fufna

Hagayya 01/2017(TOI)-Ijaarsa Hidha Haaromsa Itiyoophiyaa guddichaaf  bittaa boondii fi arjoomaa taassisan cimsanii akka itti fufan Jiraattonni Naannoo Oromiyaa Godina Iluu Abbaaboor TOI dubbise  ibsan.

Jiraattota Godinichaa Yaada kennan keessaa  obbo Taarraqany Alamaayyoo  dhagaan bu’uuraa ijaarsa hidhichaa  yeroo kaa’amee eegalee hanga ammaatti  waggaa waggaan boondii bituun gumaacha taassisaa  akka turan  dubbataniiru.

Yeroo ammas eebba hidhichaa hawwiin eeggachaa  boondii bitachuu isaanii ibsuun,  deeggarsa isaanii akka itti fufan mirkaneessaniiru.

Akkasumas,  Aadde Soofiyyaa Jamaal jiraattota naannoosaanii waliin ta’uun  ijaarsa hidhichaaf  itti fufinsaan boondii bituun  hirmaachaa turuu isaanii ibsaniiru.

Bara kanas boondii bitachuu isaanii ibsuun namoonni biroonis  adeemsa ijaarsa hidhichaa keessatti ashaaraasaanii akka kaa’an qindeessaa jiraachuu ibsaniiru.

Deeggarsaa fi hirmaannaa hidha haaromsaaf taassisan itti fufuusaanii kan ibsan obbo Xilahuun Takkaa ammas hanga hidhichi eebifamutti guumaachasaanii akka taassisan dubbataniiru.

Godinichatti dhagaan bu’uuraa Hidha Haaromsa Itiyoophiyaa Guddichi erga kaa’amee eegalee hirmaannaa hawaasaan deeggarsi  birrii Miiliyoona 150 ol  taassifamuu Itti gaafatamaan waajjirra Koomunikeeshinii Godina Iluu Abbaaboor obbo Tolasaa Asaffaa ibsaniiru.

 Ganna kanas birrii Miiliyoona 20 walitti qabuuf karoorfamee hojjetamaa jiraachuu ibsuun hanga ammaatti deeggarsi birrii miiliyoona 10 ol  walitti qabamuu dubbataniiru.

Aanaalee Godinichaa hundatti jaarsa hidhichaaf deeggarsi hawaasaan taassifamu hanga  xumuraatti cimee akka itti fufu ibsaniiru.