Itiyoophiyaan tajaajila geejjiba qilleensaa jalqabuu fi babal’isuuf biyyoota 17 waliin waliigalte

Sadaasa 29/2016(TOI)- Itiyoophiyaan tajaajila geejjiba qilleensaa jalqabuu fi babal’isuuf biyyoota 17 waliin waliigalteetti.

 Waliigaltee kan taasifte biyyoota Afriikaa, Ameerikaa Kaabaa fi Kibbaa, Awurooppaa fi jiddugaleessa bahaa 17 waliin ta’uun ibsameera.

Waliigalteen kun abbaa taayitaa siviil aviyeeshinii Itiyoophiyaa fi dhaabbilee biyyoota gita ta’an jidduutti kan mallatteeffame yaa’ii maree waggaa tajaajila geejjiba qilleensaa Saa’udii Arabiyaa Riyaaditti adeemsifamerrattidha.

Haala Kanaan Naayijeeriyaa, Gaanaa, Moorookoo, Iiswaatiinii, Seraaliyoon fi Zumbaabuwee waliin daangaa tokko malee deddeebii xiyyaaraa raawwachuuf, bakka bu’ummaa daandiiwwan qilleensaa bal’isuuf, mirgoota tiraafikii kennuu fi bakka qaqqabiinsaa dabalataa daangaa malee eeyyamuuf haala dandeessisanirratti waliigalteen mallatteeffameera.

Waliigaltichi Taanzaaniyaa, Siisheelsii fi Gaaboon waliin ammoo daandiiwwan qilleensaa Itiyoophiyaan galmeeffaman balallii deddeebisii dabalataa biyyoota jidduutti taasisuuf kan dandeessisudha.

Siviil Aviyeeshiniin Itiyoophiyaa  Raashiyaa, Ingiliiz,Kaanaadaa, Poolaand, Fiinlaand, Kuweet, Paakiistaan, Baangilaadiish fi Suriinaam waliinis waliigaltee kan taasise yemmuu ta’u, waliigaltichi balallii irra deddeebii eyyamuun carraalee gabaa bal’isuuf kan dandeessisudha.

Waliigalteen kunneen faayidaa Itiyoophiyaan siviil aviyeeshiniirraa argachaa jirtu kan guddisu akka ta’e odeeffannoon ministeera alaarraa argame nimul’isa.

Yaa’iin maree idil addunyaa tajaajila geejjiba qilleensaa Saa’ud Arabiyaatti taa’ame Itiyoophiyaa dabalatee biyyoonni 97 hirmaataniiru.