Itiyoophiyaan balaawwan addaddaa sababa jijjiirama qilleensaatiin mudatan hir’isuuf  xiyyeeffannoon hojjechaa jirti

Sadaasa 24/2016 (TOI) - Itiyoophiyaan balaawwan addaddaa sababa jijjiirama qilleensaatiin mudatan hir’isuuf  xiyyeeffannoon hojjechaa akka jirtu ministirri bishaanii fi inarjii doktar injinar Habtaamuu Ittafaa ibsan.

Ministirri bishaanii fi inarjii doktar Habtaamuu Ittafaa yaa’ii jijjiirama qilleensaa mootummoota gamtoomanii 28ffaa cinaatti marii ministirootaa dhaabbata meetirooloojii addunyaa qophaa’e irratti hirmaataniiru.

Waltajjiinkun mata duree “sirni ofeeggannoo dursaa hundaaf” jedhuun adeemsifameera.

Ministirichi waltajjicharratti ergaa dabarsaniin Itiyoophiyaan balaawwan addaddaa sababa jijjiirama qilleensaan mudatan hir’isuuf xiyyeeffannoon hojjechaa jirti jedhaniiru.

Keessumaa buufataalee fi bu’uraalee misoomaa ammayyaa meetirooloojii haala qilleensaa walitti qabuuf gargaaran diriirsuun, raga qilleensaa wayitaawaa fi ofeeggannoo dursaa kennuun tarkaanfiiwwan saaxilamummaa hir’isan hedduu fudhachaa akka jirtu ibsaniiru.

Ittidabaluunis yaaddoo balaa hir’isuuf kaawunsiliin ittisa balaa biyyaalessaa itti aanaa ministira muummeen hoogganamu hundeeffamee xiyyeeffannoon hojjetamaa akka jiru eeranii waltajjicharratti muuxannoo Itiyoophiyaa qooduusaanii odeeffannoon ministeera bishaanii fi inarjiirraa argame nimul’isa.