Waancaa Addunyaa haga ammaatti biyyoonni garee 16tti dabalaman eenyu?

Sadaasa20/2015(TOI) - Taphini Waancaa Addunyaa 22ffaa qopheesummaa Kowaatariin geggeeffama jiru erga jalqabee har'a guyyaa 10ffaa isaati.

Biyyoonni hirmaatoonni tapha waancaa kanaa 32 hunduu taphataniiru.Ramaddii 4ffaa keessaa Faransaay warreen garee 16tti dabalaman keessaa kan duraati.

Faransaay Awustiraaliyaa 4fi 1 akkasuma Deenmaarik 2fi 1 injifachuun qabxii 6 argachuun taphi tokko osoo ishee hafuu gara garee kuffisanii darbuuf taphatamuutti dabarteetti.

Tapha kaleessa taphatameen Biraaziliifi Porchugaal, Faransaay hordofuun gara garee 16tti darbuu isaanii mirkaneeffataniiru.

Ramaddii 8ffaa keessaa Porchugaal Uraagaay 2fi 0 injifachuun ramaddii 7ffaa keessaa immoo Biraazil Siwizaarlaanid 1fi 0 injifachuun qabxii 6 qaachuun marsaa itti aanutti darbuu mirkaneeffataniiru.

Biyyoonni biroon garee 16tti darban har'a irraa jalqabe guyyoota arfan dhufan keessatti taphoota ramadii isaanii keessaa taphataniin mirkaneeffatu.