Taphoota ramaddii Waancaa Awurooppaan eda Firaansiifi Poorchugaal morkattootasaanii injifatan.

Finfinnee, Waxabajjii 9/2013-Taphoota ramaddii Waancaa Awurooppaan eda Firaansiifi Poorchugaal morkattootasaanii injifatan.

Shaampiyooniin addunyaa Firaansi magaalaa Muunik Aliyaanzi Areenaatti Jarmanii goolii 1fi 0’n injifachuun dorgommicha eegalte.

Haatis Hammels daqiqaa 20ffaarratti garee ofirratti goolii galcheen Firaansi mo’atte.

Caalmaa tapha fudhatanii taphachaa kan turan taphattoonni Firaansi Pool Poogbaa, Kiliyaa Mibaphee, Kaarim Beenzemaafi Andiriyaan Raabiyoot irra deeddeebiin yaalii goolii taasisaniis goolii dabalataa galchuuf hin carroomne.

Gama Jarmaniin Ikaay Gondoganiifi Serji Nabriin carraa argataniis itti fayyadamuu hin dandeenye.

Kaleessumma gara Budaapestitti imaluun Pushkaash Arenatti Hangarii waliin kan taphatte Shampiyooniin Awurooppaa Poorchugaal goolii 3fi 0’n injifachuun ramaddicha dursuu eegalte.

Tapha deeggartoonni kuma 60 ta’an dirreetti argamuun daawwatan kanaan Raafa’eel Gureeroon daqiiqaa 84ffaarratti Poorchugal dursa yoo qabachiisu, Kiristaanoo Roonaldoo daqiiqaa 87 irratti peenalitiin, daqiqaa 90+2 irratti taphaan gooliiwwan 2 galcheera.Ronaldoon Waancaa Awurooppaan goolii 11 galchuun rikardi Misheel Pilaatiniin goolii 9 galchuun qabame fooyyesseera.

Ronaldoon biyyasaa Poorchugaaliif goolii 106 galchuun rikardii taphata lammii Iraan Ali Dayee goolii 109 qabame qooddachuuf goolii 3 qofatu hafe.Madda:-BBC Sport