Vaayirasiin Koronaa `Yaaddoo Fayyaa Guutuu Addunyaa` Jedhamee Labsame - ENA Afaan Oromoo
Vaayirasiin Koronaa `Yaaddoo Fayyaa Guutuu Addunyaa` Jedhamee Labsame
Finfinnee, Amajjii 22/2012 (TOI) Vaayirasiin koronaa `yaaddoo fayyaa guutuu addunyaa` jedhamee labsuu isaa dhaabbanni fayyaa addunyaa beeksise.
Daayireektarri olaanaa dhaabbata fayyaa addunyaa (WHO) Dr. Tewodiroos Adhaanom kaleessa ibsa kennaniin, vaayirasiin sadarkaa yaaddoo addunyaan labsame kun Chaayinaa keessatti qofaa osoo hin taane biyyoota biroo dabalatee saffisaan babal’ataa waan jiruuf jedhan.
Chaayinaan dhibee kana to’achuuf furmaataaf yaalii isheen taasisaa jirtu Dr. Tewodroos dinqisiifataniiru.
Akka ibsa dhaabbata addunyaa kanaatti haalli vaayirasii koronaa amma irra jiru biyyoota haala sirna fayyaa dadhabaa qabanitti yoo tamsa’e guddaa yaaddessaa ta’a.
Dhaabbanni kun vaayirasichaaf ka’umsa kan taate Chaayinaa dabalatee biyyoonni biroos qophii ga’aa akka taasisan dhaabbanni fayyaa addunyaa deeggarsa ni taasisas jedhan.
Vaayirasii kanaan namoonni hanga ammaatti du’an 213 yoo ta’an kan qabaman immoo 9,000 ol ga’eera jedhame.
Vaayirasiin kun sadarkaa guutuu addunyaatti biyyoota 18titti tatamsa’uu isaa BBC tu gabaase.