Walaayittaa Diichaan Dorgommii Kilaboota Kubbaa VooliibooliiAfriikaatiin Injifannoosaa Jalqabaa Galmeessise

Finfinnee Bitootessa 25/2011 Walaayittaa Diichaan Seenaa dorgommii kilaboota kubbaa Vooliiboolii Afriikaatiin injifannoosaa jalqabaa galmeessise.

Dorgommiin kilaboota kubbaa saaphanaa Afriikaa 38ffaa Gibtsi keessummeessaa jirtu dheengadda jalqabameera.

Dorgommii kanaan Walaayittaa Diichaa fi Simintoo Mugar Itiyoophiyaa bakka bu’uudhaan hirmaachaa jiru.

Walaayittaa Diichaan tapha lammataa dorgommii kaleessa taasiseen kilaba Demokiraatiik Koongoo kan ta’e Ardii Koongoo Ispaayirni tapha marsaa sadiin adeemsifameen qabxii 3 fi 0n mo’atee seenaa dorgommii kilaboota kubbaa saaphanaa injifannoosaa jalqabaa galmeessiseera.

Bara 2007 fi 2010 dorgommii kilaboota kubbaa Vooliiboolii Afriikaa adeemsifamaniin hirmaatee kan ture Walaayittaa Diichaan, tapha tokkollee mo’achuu hin dandeenye ture.

Walaayittaa Diichaan tapha jalqabaa dheengadda taphateen kilabii Keeniyaa Keeniyaa Piriizinsiin tapha marsaa sadiitiin qabxii 3 fi 0n mo’amuunsaa ni yaadatama.

Ramaddii 4ffaa keessatti kan argamu Walaayittaa Diichaan tapha ramaddiisaa kan 3ffaa har’a guyyaa keessaa sa’aatii 11tti kilabii Liibiyaa Al Siweehilii waliin ni taphata.

Gama biraatiin Itiyoophiyaa bakka bu’uudhaan dorgommicharratti hirmaachaa kan jiru kilabiin Simintoo Mugar taphoota lama amma ammaatti taasiseen mo’atameera.

Kilabiin Simintoo Mugar kaleessa kilabii Kotidivaar A.S Injes waliin tapha taphateen Tapha marsaa sadiin 3 fi 0n kan mo’atame yoo ta’u, dheengadda kilabii Bootiswaanaa Pooliis Vii’aayiin qabxii wal fakkaataa 3 fi 0n mo’ameera.

Ramaddii tokkoffaa keessatti kan argamu kilabiin Simintoo Mugar tapha ramaddiisaa sadaffaa har’a guyyaa keessaa sa’aatii 11tti kilabii Liibiyaa Al Ahaalii Tiriippoolii waliin ni taphata.

Walaayitaa Diichaa fi Simintoon Mugar dorgommii kanarratti kan hirmaatan afeerraa federeeshinii kubbaa miilaa Afriikaarraa argameen akka ta’e odeeffannoon federeeshinii Vooliiboolii irraa argame ni mul’isa.

Kilaboonni lamaan dorgommii kanarratti akka hirmaatan kan filataman piriimar liigii vooliibooliitiin duraa duubaan tokkoffaa fi lammaffaa ba’uusaaniitiin akka ta’e ibsameera.

Dorgommiin kilaboota vooliiboolii Afriikaa 38ffaa amma Ebla 3/2011tti kanturu ta’a.

Dorgommiin kilaboota kubbaa vooliiboolii akka lakkoofsa warra Awurooppaatti bara 1987 kan jalqabame yoo ta’u, kilabiin Gibtsi Alhaalii si’a 13, kilabiin tuuniziyaa si’a 6, akkasumas kilabiin Gibtsi Zaamaaleek si’a 5 mo’ataniiru.