Magaalli Shaggar keessummoota Ayyaana Irreechaa kabajuuf dhufan   simachuuf qophii xumuruu ishee ibsite

Fulbaana 19/2019 (ENA) – Magaalli Shaggar keessummoota  ayyaana Irreechaa bara kanaa kabajuuf kallattii garaa garaatiin keessummoota dhufan simachuuf qophii xumuruusaanii   Kantiibaan magaalichaa Dr. Tashoomaa  Addunyaa ibsaniiru.

Ayyaanni Irreechaa kan waggaa waggaatti keessummoota biyya keessaa fi biyya alaa hirmaachisu,  waggoota dhihoo  keessa ummata Itoophiyaa biratti  Waltajjii guddaa tokkummaa fi wal-jijjiirraa aadaa ta'aa dhufeera.

Magaalli Shaggar  namoota gara Hora Finfinnee fi Hora Arsadii  deemaniif harki caalaan isaanii  magaalicha keessa waan darbaniif  simachuun qophii xumereera.

 

 Simannaa keessummootaa cinaatti oomisha qonnaa, beelladaa fi bu'aalee  beelladaa, lukkuu, akkasumas oomishaalee harkaa, bu’aalee mukaa  beeksisuu  fi  hawaasaf gatii madaalawaan dhiheessuuf kutaa magaalichaa hunda keessatti  baazaarii fi agarsiisni ni banamu.

  Magaalaa Shaggar Kutaa Magaalaa Koyyee Faccee keessattis meeshaaleen ayyaana Irreechaa miidhagsan dhihaatanii baazaarii  fi agarsiisni banameera.

Sagantaa baniinsa baazaarii fi agarsiisarratti kan argaman Kantiibaan magaalichaa Dr. Tashoomaa  Aduunyaa  akka jedhanitti, Shaggar bara kana keessummoota ishee simachuuf qaamolee dhimmi ilaalu wajjin qindoominaan hojjechuun qophii xumuruu ibsaniiru.

Ayyaanni Irreechaa bara kanaa akka biyyaatti  yeroo itti milkaa'inoonni hedduun  itti galmaa'anitti kabajamuun isaa adda isa taasisa kan jedhaniiru.

 Kantiibaan kun, ayyaanicha yeroo kabajnu abdii guddaan, tokkummaa cimaa fi wal-jaalala agarsiisuun ta'uu qaba jedhaniiru.