Yaa'iin Dhaabbilee Amantaa Itoophiyaa Ergaa baga ittiin isin gahee dabarse

Fulbaana 16/2019(ENA): Yaa’iin Dhaabbilee Amantaa Itoophiyaa, Ayyaana Masqalaafi Daamaraa sababeeffachuun ergaa baga ittii isin gahee dabarseera.

Yaa’ichi Ibsa ENA’f ergeen akka ibseetti, Ayyaanni Daamaraa fi Masqalaa waggaa waggaan Fulbaana 16 fi 17 kabajamu, faayidaa seenaa fi hafuurawaa bira darbee, uummanni keenya tokkummaan, jaalalaafi nagaan akka jiraatu kan taasisu, miidhagina biyyaalessaafi amantaa keessaa isa guddaadha jedheera.

Ayyaanni kun jaalala garaa keessatti argamuufi hojii irraa mul’atu, akkasumas dhugaa dhokatee ture ifa baasuun akka danda’amu kan agarsiisuu fi mallattoo badhaasa amanamummaa fi ciminaan hojjechuu ta’uu ibsa isaa keessatti eereera.

Dabalataanis, Ayyaanni Masqalaa fi Daamaraa bu’uura walitti dhufeenya hawaasummaa guddaa Itoophiyaanota tokkummaan walitti fidu ta’uu hubachiiseera.

Kana malees, ibiddi Daamaraa jibbaa fi addaan fagaachuu gubee, bakka isaanii dhiifamaa fi jaalala lallabnu; jibba garaa keessa jiru baasnee gatuun araara kan itti labsinudha jedheera.

Akkuma ifni xiqqoon dukkana balleessuuf humna qabu, uummannis dukkana jibbaa, addaan fagaachuu, haaloo fi haaloo ba’uu kan ifa jireenyaa dukkaneessu balleessuuf ifa hafuurawaa isa gargaaru hidhachuu akka qabu Yaa’iin Dhaabbilee Amantaa Itoophiyaa waamicha dhiyeesseera.

Ayyaanni kun walitti dhufeenya hawaasummaa Itoophiyaa, aadaa keessummaa keessummeessummaa fi duudhaa aadaa ishee addunyaaf beeksisuun, hambaa guddaa ta’uu isaa eeruun, hoggantoonni amantaaleefi hordoftoonni amantichaa hafuurri jibbaa fi walitti bu’iinsaa kan ittiin dhabamsiifamu ta’u hubachuu akka qaban ibseera.

Yeroo Ayyaana Masqalaa fi Daamaraa kabajnu, dadhaboota, warra qe’ee isaanii irraa buqqa’an, akkasumas namoota rakkoo keessa jiran gargaaruu fi wal bira dhaabbachuun, jaalala Waaqayyoo hojii irra oolchuudhaan agarsiisuun akka ta’uu qabu Yaa’iin Dhaabbilee Amantaa Itoophiyaa waamicha isaa dabarseera.