Yunivarsiitiin Madda Walaabuu damee turizimii qo’annoo fi qorannoon deeggaruuf hojii hojjechaa jiru  ni cimsa

Fulbaana 15/2019 (ENA)- Yunivarsiitiin Madda Walaabuu damee turizimii qo’annoo fi qorannoon deeggaruuf hojii hojjechaa jiru  cimsee akka itti fufu pirezidaantiin Yunivarsiitichaa Dr. BiraanaMasqal Xannaa ibsan.

Qo’annoo fi qorannoon Yunivarsiitichi damee kanarratti gaggeessu industirii turizimii kan dadammaqsuu fi sadarkaa olaanaatti akka ceesisan himameera.

Pirezidaantiin Yunivarsiitichaa Dr. Biraana Masqal Xannaa ENA’f akka ibsanitti, mootummaan hawattoota turizimii misoomsuuf xiyyeeffannoo kenneen turtiin turistootaa dheerachuun galii achirraa argamu guddisuuf  qooda guddaa bahachaa jira.

 

Bakki Yunivarsiitichi itti argamu Baalee fi naannawichi damee Turizimiif humna guddaa waan qabuuf  Yunivarsiitichi  damee kana qo’annoo fi qorannoon deeggaraa akka jiru dubbataniiru.

Naannawichi  lubbu qabeeyyiin hedduu fi hambaaleen seena qabeessaa sadarkaa idil addunyaatti barbaadaman kan keessatti argamu waan ta’eef, Yunivarsiitichi kennaawwan kana dhaqabamaa taasisuuf  qooda fudhattoota waliin ta’uun  hojii hedduu hojjechaa jira jedhaniiru.

Godinawwan Baalee , Baalee Bahaa fi Arsii Lixaatti kan argaman Holqi Soof Umar, Dirree Sheek Huseen fi Paarkii biyyaalessaa gaarreen Baalee guddina damee Tuuriizimiitiif dandeettii guddaa ta'uu isaanii eeraniiru.

Paarkii biyyaalessaa Gaarreen Baalee  "Paarkii tokko addunyaa hedduu" jedhamuun kan beekamuu fi iddoowwan hawwata turiizimii biraa naannichatti argaman caalaatti akka beekamanii fi deebi'anii akka misoomaniif tattaaffii taasifamu keessatti Yuunivarsiitichi gahee isaa gumaacha turuu ibsaniiru.

Rakkooleen  iddoo hawwata Dirree Sheek Huseenitti  mul'atan furuudhaan hambichi caalaatti akka misoomu gochuuf qorannoowwan hayyoota Yuunivarsiitichaan gaggeeffamaa jiran qaama tattaaffii kanaa ta'uusaa  hubachiisaniiru.

Hayyoonni Yuunivarsiitichaa qaamolee qooda fudhattoota biroo   waliin ta'uun waggoota darban keessatti qorannoo taasisaniin, Hawwata Tuuriizimii fi holqoota 100 ol ta'an kanneen kanaan dura naannichatti bal'inaan hin beekamne akka beekamanii fi  akka galmeeffaman taasifameera jedhaniiru.

Akkasumas, iddoowwan hawwata Turiizimii kunniin  argaman salphaatti adda baasuuf kan gargaaru kaartaan dijiitaalaa kan hojjetameef ta'uu pirezidaantichi eeraniiru.

Biyyattii keessatti iddoowwan hawwata turizimii fi hoteelonni babal'achaa jiruu kan eeran  Dr. Birhaanamasqal  Yuunivarsiitichi meeshaa industirii guddachaa jiru kanaaf madaalu ogeessota gahumsa qaban horachuuf hojiiwwan adda addaa raawwachaa jiraachuu ibsaniiru.

Yuunivarsiitichi dhiyeenya kana mata duree "Barnoota Tuurizimii fi Keessummeessummaa Waraqaa Qorannoo Namtolchee (AI)tiin sakatta'uu" jedhuun waltajjii qorannoo idil-addunyaa qopheesse walitti hidhaminsa naannoo damichaa  cimsuudhaan teeknoloojiidhaan deeggaruuf gahee guddaa akka qabu  addeessaniiru.

Waltajjiin  kun  yuunivarsiitichi iddoowwan Hawwata Turiizimii caalaatti misoomsuu fi beeksisuuf tattaaffii waaraa taasisaa jiruuf muuxannoo idil-addunyaa kan irratti argame ta'uus ibsaniiru.

 Yuunivarsiitichi rakkoolee fi carraawwan gaarii damee Turizimii keessatti mul'atan qorannoodhaan adda baasuun, sekteericha fooyyessuu fi guddina turiizimii waaraa mirkaneessuuf tattaaffii jalqabe cimsisee kan ittifufu ta'uu pirezidaantichi beeksisaniiru.