Omishaa fi Oomishtummaa Bunaa guddisuun bu’aawwan   qabatamaa argaman 

 

Fulbaana 11/2019 (ENA): Tarkaanfiileen jijjiiramaa damee bunaan hojiirra oolan  omishaa fi oomishtummaa bunaa guddisuun bu’aa qabatamaan  akka galmaa’an dandeesisuu Abbaan Taayitaa  Bunaa fi Shaayii  Itoophiyaa ibseera.

Adeemsa gabaa  bunaa gababsuu fi hojiileen qulqullina irratti hojjetaman galii buna irraa argamu akka  dabalaluuf bu’uura kaa’uusaa Abbaan Taayitichaa hubachiiseera.

 Daarektarri Abbaa Taayitaa Bunaa fi Shaayii  Itoophiyaa Dr. Addunyaa Dabalaa, ENA waliin turtii taasisaniin  akka ibsanitti Itoophiyaan damee   bunaan tooftaawwan haarawaan hojii hojjetteen   bu’aa qabatamaa  galmeesisaa jiraachuu   ibsaniiru.

 

Fakkeenyaaf, bara bajataa 2018 xumurame keessatti doolaara biliyoona 3 argachuuf karoorfamee, doolaarri biliyoona 3.13 argamuusaa fi kunis karoora ol ta'uusaa daarektarri olaanaan kun  ibsaniiru.

Bunni  sadarkaan isaanii gadi aanaa ta'an sirna gabaa irraa akka ba'an taasifamuusaa ibsuun, Buna Koomershaalaa gara Buna Ispeeshaaliitti akka ol guddatu  taasisuun  gabaa  addunyaa irratti dorgomaa ta'anii turuun akka danda'ame dubbataniiru.

  Qonnaan bulaan kallattiin buna gara alaatti akka erganiif hojmaanni  jajjabeessu  diriiruusaa ibsuun, kanneen  kallattiin gara alaatti erguu hin dandeenye immoo Al-ergitootaaf qindeessuun haalli  itti   dhiheessuu danda'an  mijachuusaa eeraniiru.

Kunis adeemsa gabaa gabaabsuu akka dandeessise eeranii, adeemsa kanaan  oomisha qisaasa'u hir'isuun bu'aan argamuusaa dubbataniiru.

Galiin Buna irraa argamu  sharafa alaa dabaluu irratti shoora gaarii gumachaa jiraachuusaa dubbataniiru.

Akkasumas sagantaan 'Ashaaraa Magariisaan ' omishaa fi oomishtummaa bunaa guddisuu irratti shoora guddaa gumachaa akka jiru ibsaniiru.

Waggaa shan dura waggaatti bunni oomishamu toonii kuma 500  akka hin caalle  kan ibsan, Dr. Addunyaan  bara bajataa xumurame keessa bunni meetriktoonii miiliyoona 1tuqaa 5 oomishamuusaa  eeraniiru.

Bara bajataa 2019  oomisha bunaa gara alaatti ergamu irraa galii doolaara biliyoona 4 tuqaa 1 argachuuf karoorfamuusaa  ibsaniiru.

Karoora kana milkeessuufis qophiin barbaachisu taasifamee gara hojiitti galamuusaa  daarektarri olaanaan kun ibsanii,  dhimmi bakka  gahumsa gabaa babal’isuu xiyyeeffannoo addaatiin irratti hojjetamaa jiraachuu dubbataniiru.

Yeroo ammaa kana biyyoonni  66 ta'an Buna Itoophiyaa fudhachaa jiraachuu isaanii eeranii ,  Imbaasiiwwan fi qoonsilaawwan Itoophiyaa biyyoota adda addaa keessatti argaman  Buna Itoophiyaa  beeksisuu irratti hojii jajjabeessaa hojjechaa akka jiran dubbataniiru.