Gaaffiin Mirga abbummaa Hulaa Galaana Itiyoophiyaa gaaffii nageenya naannawichaa mirkaneessuu fi jiraachuu fi jiraachuu dhabuuti

Fulbaana 10/2019 (ENA): Gaaffiin Mirga abbummaa Hulaa Galaana Itiyoophiyaa gaaffii nageenya naannawichaa mirkaneessuu fi jiraachuu fi jiraachuu dhabuuti ta’uu hayyoonni dubbatani.

Itiyoophiyaan hula galaanaa mataashee kan qabdu turte shira irratti dalagameen kan mulqamte, baay’ina ummataa amma qabduu fi guddina dinagdee saffisaan guddachaa jiru waliin qabeenya uumamaa ishee deeffachuun dirqamadha.
Yeroo ammaa dhimmi abbummaa buufata galaanaa dhimma Itoophiyaa qofa osoo hin taane, hawaasa addunyaa irraas deeggarsa bal’aa argateera.

Mootummaan dhimma haqaa fi misoomaa kana karaa dippilomaasii, karaa nagaa fi walitti dhufeenya diinagdee cimsuun dhugoomsuuf carraaqqii addaan hin cinne gochuu itti fufee jira.

Yunivarsiitii Finfinneetti barsiisaa fi qorataan Federaalizimii fi Bulchiinsa kan ta’an Dr. Tasfaayee Jimaa ENA waliin turtii taasisaniin akka himanitti,Dhimmi Galaana Diimaa Itoophiyaaf madda daldalaa fi galii caalaa dhimma birmadummaa fi lubbuuti jedhani.

Daldala biyyattii babal’isuu fi misooma qonnaa fi qurxummii ishee guddisuuf buufanni galaanaa kuni gahee murteessaa qaba.

Kana malees, carraan ji’oopoolitikaa baay’ee barbaachisaa ta’e kun dhiibbaa dippilomaasii fi siyaasaa Itoophiyaan naannichaa fi dirree idil-addunyaa irratti qabdu haalaan cimsa.

Kanaaf Hulaa Galaana Diimaa argachuun dhimma bu’uuraa nageenya bal’aa fi misooma itti fufiinsa qabu biyyattiif wabii ta’edha.

Akkaadaamii Hooggansaa Finfinneetti dursaan qorattootaa obbo Solomoon Tafarraa akka himanitti, Gaaffii abbummaa hula galaanaa Itoophiyaa sirriitti hubachuuf achii dhuftee seenaa, seeraa fi ji’oopoolitikaa qorachuun barbaachisaadha jedhani.

Haalli nageenyaa fi siyaasaa naannichaa haalaan jijjiiramaa ta’e keessatti abbummaan buufata galaanaa Itoophiyaaf dhimma lubbuun jiraachuu fi birmadummaa murteessaa ta’uus eeraniiru.

Kanaafis hayyoonni odeeffannoo qorannoon deeggaramee maddisiisuu fi waltajjiiwwan idil-addunyaa irratti fedhii biyyattii irratti hubannoo uumuun faayidaa biyya isaaniitiif gumaacha gaarii taasisuu danda’u.

Dura taa’aan Waltajjii Tarsiimoo Abbayyaa fi Galaana Diimaa Dr. Abbabaa Gammachuu akka jedhanitti,Hayyoonni dhaabbata tokko keessatti walitti qabamanii dhimma abbummaa galaanaa Itoophiyaa qorannoo fi qo’annoodhaan yaada imaammataa maddisiisuun, waltajjiiwwan ardiilee fi idil-addunyaa irratti kaasuu qabu jedhani.

Dhimma kana galmaan gahuuf Waltajjiin Tarsiimoo Abbayyaa fi Galaana Diimaa kan hundeeffame ta’uu eeruun, qorannoo gama teessuma lafaa, baay’ina ummataa, walqixxummaa fi walitti hidhamiinsa naannootiin gaggeessuun yaadota dantaa biyyattii tajaajilan maddisiisaa akka jiru ibsaniiru.

Itiyoophiyaan dhimma abbummaa galaanaa irratti dippilomaasii karaa nagaa fudhatte itti fufsiisuudhaan gaaffii dhimma hula galaanaa ishee jabeessitee tarkaanfachiisuuf dandeettii qabdus dinqisiifannaa qaban ibsaniiru.

Miidiyaa Dijitaalaa ENA hordofaa- https://www.ena.et/web/links