Hojii Miidiyaafi Kominikeeshinii hojjetameen oduu fi olola sobaa qolachuun danda’ameera- Obbo Hayiluu Addunyaa - ENA Afaan Oromoo
Hojii Miidiyaafi Kominikeeshinii hojjetameen oduu fi olola sobaa qolachuun danda’ameera- Obbo Hayiluu Addunyaa
Hagayya 23/2018 (ENA): Hojii Miidiyaafi Kominikeeshinii hojjetameen oduufi olola sobaa qolachuun danda’ameera jedhan Hogganaan Biiroo Kominikeeshinii Oromiyaa obbo Hayiluu Addunyaa.
Biiroon Kominikeeshinii Oromiyaa waltajjii Fooramii waloo Miidiyaaleefi Qunnamtii Uummataa waliin dhimmoota raawwii karooraa bara 2018fi qophii karoora bara 2019 irratti marii geggeesseera.
Obbo Hayiluu Addunyaa wayita kana miidiyaan humna guddaa addunyaan guddina ariifataa gama hawaasummaa, dinagdeefi siyaasaan akka galmeessitu taasisaa jiru ta’uu himaniiru.
Guddina teeknoloojii odeeffannoo wajjin walqabatee miidiyaan ogeessota ga’umsa qabaniin guutamaafi meshaalee ammayyaa hidhachaa dhufuu isaaniitiin odeeffannoon bakkaafi yeroon osoo hin daangeffamin lammilee bira ga’aa jiraachuu dubbatan.
Haa ta'u malee, qabiyyeen oduufi odeeffannoo dhugaa fakkaatan garuu dhugaa hin taane guyyaa guyyaan uumamaa fi tamsaafamaa jiraachuu ibsaniiru.
Akka naannoo Oromiyaatti Fooramiin Miidiyaafi Quunnamtii Uummataa hundeeffamuu hordofee hojii miidiyaafi kominikeeshinii hojjetamaa dhufeen oduufi olola sobaa qolachuun danda’amuus eeraniiru.
Bara hojii 2018 keessattis hojiin miidiyaafi kominikeeshinii sadarkaa biyyaafi naannootti hojjetameen milkaa’inni galmaa’uu kaasanii, Fooramii keenyaan waltumsuun odeeffannoo naannichaa waaltessuun danda’ameera jedhaniiru.
Marii Biyyaalessaa biyyattii gara boqonnaa haaraatti ceesisaa jiruufi Filannoo Waliigalaa 7ffaa irratti hojii guddaan hojjetamaa akka ture ibsuusaanii ragaan Kominikeeshinii Oromiyaarraa agame ni mul’isa.
Hoogganaa Itti aanaa Biirichaa obbo Isheetuu Sirneessa gama isaaniin, milkaa’inoota Miidiyaafi Qunnamtii Uummataa bara 2018 keessatti galmaa’an daran cimsuun itti fufsiisuuf, akkasumas hariiroo fi tumsa jiru caalmaatti jabeessuuf xiyyeeffannoon addaa ni kennama jedhan.
Hirmaattonni Fooramichaas, fooramichi wal hubachuu, waliin karoorsuufi qindoominaan hojjechuun odeeffannoon naannichaa olaantummaa akka argatu kan dandeessiseefi bara 2019ttis bulchiinsa odeeffannoo fooyya’aa dhufe daran cimsuuf ajandaa miidiyaa waliin qophaa'uufi eeruu kallatti tokkoon kennaman fudhachuun odeeffannoo saffisaafi bu’a qabeessa ta’e uummata biraan ga’uuf cimsanii kan hojjatan ta'uu ibsaniiru.
