Fanti Rasih Qaasima Golina Daqaaral Qokol Soolo gexsen .

 

Addis Ababa ,Laqin-Alsak 11,2018 (ENA)Fanti Rasih Qaasima Golina Daqaarak Kalluwan Magaalal Asaaki Macsenta Ummatta Leeda Partih Qokol Soolo Gexisak Maacisen.

Tama Sooloh Aracal Rakaakayak Ciggiila Prezixentiiy Ardi Biiroh Saqal Gifta Qumar Nuur Qarba Edde Anuk Rakaakayay, Rasu Kee Daqoorit Miraaciinuuy Baxaabxsa le Ayyunti Exxaaxi Edde Tengele .

 

Sooloh Aracal Geytimaak Yab Abeh Yan Rakaakayak Ciggiila Prezixentiiy Ardi Biiroh Saqal Gifta Qumar Nuur Qarba Itiyoppiya Afrikal Ceelalloh Tan Baaxo Edde Tekkem Leeda Partih Udduur Kinnim Ascassuuk a Missoyna Itiyoppiyal Sugeh Yan Inki-gid Akkiyyi Taqabiik Gexxaamah Tooboke Parti Kinnuuk Awayih Udduur Itiyoppiyah Xaylo Itiyoppiyal Inki Ceelo Kee Tummiqitti Geyteh Tanim Kassiise .

Leeda Parti Abteemik Arac Taaxigeeh Abtu Waytaamah Gulguluh tan Parti Kinnim Yescesseh Yan Fanti Rasuk Naharsi Saqal Gifta Cuseen Macammad Zahab Gersi Mari Qafar Baaxol Luk Sugeh Yan Uma Daalisso Missosseh tan Partiy Foocah Ummatta Caabih tan Parti Kinnih Tanim Baxxaqise .

 

Golina Daqaarak Naharsi Saqalah Yan Gifta Qali Ibraahim Isi Le Katuk Iyyeemih Leeda Parti Abenno Hinnay Abteemih Bagul Ummattah Taysem Qaagitta Parti Kinnim Ascassuuk Ummatta Sugtem Taaxigeeh Tanim Abluk Leeda Partik Xaqut Gacaanam Faxxintah Tanim Yiysixxige .

Qokol Sooloh Aracal Tengeleh Tan Ayyunti Exxaaxi Inteemih Taturte 27 Liggiditteh addat Akke wayteh Tanim 8 Liggidih addat Tekkem Kassiiseenik Lakal Laqin-alsak 24 Takku Wayta 7 Heele Agatak Amoladi Dooroh Leeda Parti Dooreloonum Qafárak Mangaafa Retteemah Oytal Yescessen