Qafar Ummatta Milaagi Doolatih Macalal Teetih Taguude Kunnabna Geyteh- Gifta Macammad Qali Biqdo

 

Addis Ababa Laqinik 07-2018(ENA)Milaagi Doolatih Diggow Kee Kobborsinte Milaagi taamoomil Qafar Ummatta Liggiditteh baxaysitteh kak sugte Siyaasa Kee Maddur Tuxxiiq Daabisak Teetih Taguude Konnabna Geyteh tanim Gifta Macammad Qali Biqdo baxxaaqise.

Qafar Rakaakayih Doolatak Angaaraw Biirok Naharsi Saqalah yan Gifta Macammad Qali Biqdo Agatak Milaagi gexsoh addat Qafar Rakaakay Fayya le doori digirak geytimam diggoyse.

Gifta Macammad Qali abeh yan baxxaqsal Warrayteh tan dagoo liggiditte Qafar Rakaakayal tummullee daddos taamoomi kee rakiibô daddoosih xisneena Rakaakay Ummattak manô cogdah milaagu dubuh hinnay agatak Maddur Gaddih dadalah faxxinta ukummo daffeseh tanim qaddoose.

Baxsa luk Buqrê luddal tekkeh tan taamoomi Kee Faacissoosâ Daddoosul akkuk geytinta taamoomi Rakaakayal anballayuk geytinta Maaqiddi Caabih Taqabitteh Fidgah Kaxxa qokol tekkeh tanim yescesse.

Milaagi doolat reeda yibbixe udduruk xabba haanam Rakaakayah baxsa le hangi yontocowwem xer udduruh sugte Qadliinoh esseroora raddi geytam xiqsissem yescesseh yan Gifta Macammad Qali Biqdo Qafar Ummatta awakih uddur agat caddol margaqa yaceenimih caddol leh tan gabat agle maqarroosaanamal yanballee xali Milaagi faydoodi kinnim kasiise.

Taham kaadu Rakaakay edde suge deelimik awaquk Fanteenâ Siyaasah Faage kee Konnabnâ caddo fanah yamaatuh xiqsisseh tanim Gifta Macammad qaddoose.

Geytinteh tan Mayso Kee Konnabna Maqarluk diggowtuh Rakaakay Ummatta Doolat xaqut gacak Salaam dacayri Kee Daddos taamoomi yaysissikeenimih taamoomi diggoosak gexaanam faxxintaamih farmo ellecabol tatruseh yan Biirô Saqal addat kak nan milaagi gexso Qafar Ummattah tuxxiiq diggoosaanam dubuh hinnay Itiyoppiyah Inkittinaane kee Leeda diggowtuh kaxxa doori lem yescesse.