Qado Dirrik 24 Itiyoppiya Sitta Fanah Bahte Kobxissa Daalissoh Mafdaga Edde Qimbisen.

 

Addis Ababa Qasa Dirrik 1/2018(ENA) Agat Caddol Qado- Dirrik 24 Itiyoppiyah Xaylo Sitta Fanah Bahte Kobxissa Daalissoh Mafdaga Edde Qimbisne Wakti Kinnim Qaddoose.

Qafar Rakaakayak Samara Magaalal Baaxo Milaagu Geytime Daddos Mayso Faatit Yace Qokol Soolo Gexsen.

Ta Qokolih Soolot Rakaayak Fayya Le Miraacinnuy , Doolat Taama Abeenitiy , Samara-Loogiyah Miraacinu Kee Ummattay , Dubti Magaala Kee Daqar Ummatta Elle Geytimen.

Leeda Missoynak Qafar Rakaakayih Luddih Saqal Gifta Macammad Cuseen Qado Dirrik 24 Baaxo Caddol Mangantinaan Xalootih Diifu Kinnim Qaddoose.

Leeda Paartik Qafar Rakaakayih K/Buxah Saqal Gifta Macammad Cuseen Qado Dirrik Itiyoppiyah Xiglok Catak Celallo Fan Fayya Heeh Yan Milaagu Kinnim Yescesse.

 

Qafar Ummatta Qado Dirrik 24 Lawin Dariifal Mugaaqisen Suge Fidin Ardi Soono Sugte Buqre Taama Baarisak Rakaakay Caddol 53 Alfik Hektaarak 500 Alfi Hektaara Fan Maqar Le Taama Abbinowtem Gifta Macammad Cuseen Yescesse.

Qado Dirrik 24 Federaalizim Siirat Diggoysak Inkih Tan Rakaakayite Baaxo Caagidal Meqe Gabatagle Akah Yallen Innah Geysiise Milaagu Kinnim Qaddoose.

Samara-Loogiyi Magaalah Xiinissoh Saqal Gifta Qabdu Muusa , Doolat Ummatta Qidadoy , Daddos Kee Gexsi Luddittel Baxsale Gabatagle Akah Yaalen Innah Assakat Leh Tan Taama Warraye Milaagi 8 Liggidih Addat Abbinowtem Yescesse.

 

Qafar Rakaakayih Inayta Samaara Magaala Milaagi Udduruh Addat Koxider Daddosuy , Baad Caddoh Gudgudite Kee Festivaalite Akah Massosanah Kee Qasri Xisne Elle Baarimtanah Leeda Paarti Baxsale Hangi Akah Acayuk Meqe Xaalot Geytimem Gifta Qabdu Muusa Yescesse.