Qimmisenih Yanin Daddos Taamoomit Ummattak Mano Edde Milaagonuh Sarrimaane Le Salaam Diggoosanam Faxximta

Addis Ababa Caxah Alsak 11/2018 (ENA) Wallaggah Dariifal Qimmisen yanin Daddos Taamoomi Gabakalak Ayyuntak Mano Edde Milaagonuh Sarriino Le Gurral Salaam Diggoysaanam Faxximtam Naharsi Malaak Dr Abiyyi Acmad Qaddoose.

Naharsi Malaak Dr Abiyyi Acmad Ayro Culmah Wallaggah Rasul Keeto Rakiibo Daddoosuk Efqe Buqreh Cuggayso Taama Qimmibisise.

Tama Dooqaysoh Taddeeral Taturuse Farmol Iyyeemih Dariifal Sarrimaane Le Salaam Baarisoonuy Ummattah Leh Tan Daddos Esseroorah Faxxiima Raddi Yacoonuh Doolat Digga Le Margqa Luk Taamitak Geytimaanam Qaddoose.

Wallagga Warrayte Liggiditteh Addat Saay Taqbittek Gexxaamah Faxxiimah Yan Daddos Gee Kalah Raqtem Ascassuk Sugteh Tan Taqbittek Awquk Qusba Addah Leeda Mafdaga Qimmibisak Salaam Diggoosak Daddos Taama Maqarroosanam Faxximtam Qaddoose.

Dariifah Ayyunti Salaam Tuxxiq Maca Kinnim Abinah Yaaxige Ayyunta Kinnim Asacassuk Takkay Immay Saay Taqbitte Gexxaamah Ummatta Gino Gaddat Elle Faxximta Gurral Antifqe Woonuh Gexkalitte Sugtem Diggoosak Geytimeh Yan Saamit Cattiimak Sarriino Lennal Salaam Barisoonuh Hangi Akah Acyuk Taamitaanama Faxximtam Qaddoose.

Ityoppiyah Ayyunti Booditte Walal Yafdigeenmih Nihiritte Dumaak Lem Kassiisak Salaam Faxxah Tan Dagoritte Oggolak Salaam Gital Taqbitte Walal Yafdgoonuh Gulugulluh Geytimaanma Qaddoose.

Asaaku Dooqaysen Keeto Karawwad 5 Alfiik Daga Takke Baaxo Edde Yamruteenim Duudumtam Ascassuk 10 Alfiik Daga Yakke Buxah Marah Tuxxiq Allalem Qaddoose.

Girale Gaadih Giclo Gexisaasak Geytimita Maritte Salaam Fanah Yamtoonuh Baaxoh Idoolay Diini Abbobti Kee Tu Taaxagoh Doori Fayya Leh Yanim Yescesse.

Mango Liggiditteh Abbinoowe Wayteh Tan Daddos Cuggaysoosa Inkih Tan Ityoppiyal Abbinoowak Geytimtam Ascassuk Keeto Karawwad Tonna Celtah Tan Daddos Cuggaysoosa Kaxxa Milaagi Abto Kinnuuk Baaxô Xaylok Mano Milaagu Akkelem Kassiise.