Ummattah Awlaytiitih Malah Buxa Ummatta Inkittiinosaanah  Salaam Kee Daddos Caagiidal Abak Geytiman Macala  Diggoysele Lon.

 

Addis Ababa; C/ Kudok  13/2018 (ENA): Ummattah Awlaytiitih Malah Buxa Parlaamak Diplomaasi Kee Awlaytiinoh Taamoomil  Ummatta Inkittiinosiyyay  Salaam Kee Daddos Caagiidal Abak Geytiman Macal Diggoyseloonum  Malah Buxak Ciggilta  Caxah Afteenah  Tan  Loomi Bedo Qaddosse.

Salaam Malaak  Ummattah Awlaytiitih Malah Buxa Lih Cattiimak, Federaal Kee Rakaakayitteh  Malah Buxah  Madqa  Yayyaaqenim Kattataanam Kee  Lowsiisanamih Taamoomil Wagitta Salaam Dagoritte Luk   Elle  Abbinosaanam Xiqqimtah Tan Caagiidal  Wagittaamal  Walal Gudgud Bicisen.

 

Ummattah Awlaytiitih Malah Buxak Ciggilta  Caxah Afteenah Tan Gifti  Loomi Bedo Tama Aracal Elle  Qaddosennal Salaam Yaanam Agat Dadalih Rakiibo Kinnim Baxxaqise.

 Tonnah  Salaam Yaanam    Baaxo Xaylo Elle Faxximta Gurral Taamittuh Salaam  Rakiibo Kinnim Ascassuk   Buqreh Xiinah Murtissoh   Telemmo Abeenit  Xalootuh  Doolat  Daddos Taamoomi  Elle Faxximta Gurra Diggosuy  Kusaq Abeenit Qusbamih Hadliyya  Aboonuh Rakiiboh Raqtam Kinnim Tiysixxige.

Salaam Baaxo Caddol Yamatuh  Inki Inki Marak Qamblaanam Akke Sinnim Kinnuuk  Inkih Tan Agat  Xaylo  Elle Faxximita Gurral Gabah Assagolla Edde Haak Taamate Kinnim Qaddosse.

Salaam  Maqarroosanam   Baaxo Xisen Kinnim Ascassuk,  Agat Caddol Yambulleye Salaam Sarrimaane Le Gurral Diggoosak   Agat Daddos  Yasissikoonuh Kaxxa Doori Lem  Baxxaqise.

Parlaamah Diplomaasiiy Awlaytiinoh Taama Kee Kalah Tan Angagoyyitte Ummatta Inkittinooy   Salaam Caagiidal Abak Geytimta Macal Diggoyseloonum   Kassiise.

Tama Gudgudul Ummattah Awlaytiitih Malah Buxak Ciggilta Caxah  Afteena  Loomi Bedo, Salaam Malaak Gifta  Macammad Edris, Naharsi Malaakih Kutbeh Buxal Demokraasi Xisneh Fanteenak Koobaahisse Malaakah Yan Gifta Bikila Hurrisa (Phd) Kee Kalah Tan Qibinitte Edde Tengeleh Tanim  qaddoosen.