Buqrê luddal tekkeh tan taamal rakaakayak weelô xisne diggowte -Gifta Macammad Qali

Addis Ababa Qunxa Gerbluk 4 Sanat 2018 (ENA)

Buqrê luddal yekkeh yan macalal rakaakayak weelô xisne tekkeh tanim qafár rakaakayak Doolat angaarawih biirok naharsi saqal gifta Macammad Qali Biqiido qaddoyse.

Gifta Macammad Qali elle qaddoyse innal, qafar rakaakay "laqon dareefay, maggô buqrê elle yaydarreenim mabicta" itta daalisso qagte waytuh bayisak, buqrê luddal rakaakay yambulle milaagu abeh yanim yescesse.

 

Qafár rakaakay milaaguk lakal buqrê luddah hangi acayuk baxaabaxsa le buwrê samad aydarruk axcih caxá mixu kee caxaaxuway, tonnah maaqiddi siiratih caabi takku maggo taamoomi abbinowtem kinni.

tatreh yan sanatih addat inkih yan rakaakay rasittel maggoh tan buqrê taamoomi tekkeh, rakaakay kaadu leh xamcin darriitay elle yubqureenimit murti kak geytima kinni.

Awayih udduur qafár rakaakayal karmâ roobut 45 alfih hektaar yabquroonu ekraaro haak, taamitak geytimaanam diggowte.

Teefiy, Papaayay, Sanaadiriy, muuzuy, garba silla kee kalah tan buqrêera tatre miizaniyyat sanatih addat baar luk yubquren.

Awayih udduur kaadu rakaakay buqrê luddal hangi haak geytimam ascassuk ta luddal ummattâ yaynebeebedeenimih taama baar luk tekkeh, tonnah kaadu buqrê satqoh xayyoosuy, mansoofa taqabih fidga takke calli maaqattooti abbinowtem gifta Macammad Qali Diggoyse.