Konnabi Daqaarak Uruc Kee Edde Gacni Awdal Geytimta Dessot Gufne Tekke.

Addis Ababa Laqinik 14 Sanat 2017 (ENA)

Qafar Rakakayih Doolat Limo Kee Iko Stareh Ayfafaayak Ciggila Saqala Gifta Edris kadir Kee  Qafar Lee Tamoomik Ciggila Saqalah Yan Gifta Macammad Darasa Meysiisoy Konnabi Daqaarih Miraacinu Garraf Dessot Gufne Abaanamih Taama Tekke.

Tama Gufneh aracal Rakaakayak Yemeeteh Yan Gifta Edriis Adam iyyeemih Konnabi Daqaarih Ummatta Garbo Deesanam Maca Kinnim Nanu Akah Warisna Ummatta Hinnay Nanu Akak Baritna Mara Kinnitoonuk Abtaanah Tanin Taama Bisoh Haytaanam Sin Kassiisa axcuk yaabe.

 

Tonnah Rakaakayak Yemeeteh Yan Gifta:-Macammad Darasa Meysiiso Iyyeemih Dessoh Caddol Ahaak Yayse Xalootuy Culenta Akak Geytimuh Doolat Kee Samara Jaamiqat Sin Elle Cattam Faxximtaamal Sin Qokoluh Nee Kee Daqar Miraacinu Abenno Axcuk Taamitah Yan Marah Aydukuma iyyanamih Farmo Tatruse.

Tonnah Konnabi Daqaarak Naharsi Saqal Gifta Macammad Yacya iyyeemih Dessò Ayyuntah Buqureh Takkeeh Manò Maysaasat Axaw lem Kee Tonnah Dubaali Gersi Baxooxak Amaatuk Elle Daffeya Dariifah ayyuntah Kaxxa Tuxxiq Lem Yescesse.

Illacabol Konnabi Daqaarak Buqre Kee Ginô Gaddih Daddoosih Maktabak Saqalah Yan Gifta Siraaj Muusa Iyyeemih Ta Dessoh Caddol Ni-maktab Faxximmayah Yan Qokol abennooh, ahaak aysuk dariifah ummatta culenta akak elle geytah tan innih taama foocah fan sittaluk abenno axcuk Yiysixxige