Leê Gaddih Xiinissoh Maqarroosih Cugayso Yiysixxigen

Addis Ababa Qasa Dirrik 20 Sanat 2017 (ENA) 

Baaxoh Addah Tan lee gaddi kusaaqih cugayso xalot le sittat axawah tan lee gaddi xiinissol akah takkennah Abaanam Faxximtam  yiysixxigen. 

Ta Cugayso Aysaxaaxagih  Tadeera Lee Kee Efeq Malaakah Yan  Habtamu Itefa (Dr. E/R), Itiyoppiyal Denmark Ambasadderih Yan Sune Krogstrup, Lee Caagidih Kutbeh Buxah Saqoltiiy, Jaamiqat Mihratleela Kee Kalah Tan Wagitah Yan Dagorti Edde Tengelem Qaddoysen  

5 Sanatih Gideh Abbinoysoonu Waan  Tama Cugayso Lee Kee Enerjih Malaak Deniyah Doolat Lih Cattiimak Abnisaanam Kinnim Qaddoosen. 

 

Lee Kee Efeq Malaak Habtamu Itefa (Dr. E/R) Elle Qaddosennal, Taham Fanah Itiyoppiya Baaxoh Addah Leeh Gaddittel Ixxima Kee Maxxat Leh Tan Oytitte Luk Sug Waytam  Kassiise. 

Ta Cugayso Denmark Qokol Leh Tan Leeh Gaddih Xiinissoh Aysiisiyyal Hadaf Lem Kinnim Kee Jaamiqat Mihratleela Abak Sugte Kusaqittel Rakitak Itiyoppiyak Baaxoh Addah Leeh Gadda Edde Anuk Ixximaay, Maxxat Kee Arooca Edde Anuk Saynis Gital Yaybulleenim kinnim Kassiise. 

Itiyoppiyal Xaani Ambasadder Sune Krogstrup Elle Qaddossennal, Ta Cugayso Sittat Leh Tan Lee Gaddih Xiinisso, Hawa Xisneh Anxaxin Daddosih Makcagguru, Tonnah Itiyoppiyak Agat Lee Kee Hawa Milaagih Makcagguru Qokoltam Qaddosse. 

Denmarkik Aarhus Jaamiqatih Awlaytuh Yan Anders Vest Kristiansen (Dr) Kay Jaamiqat Itiyoppiyah Jaamiqatitte Lih Baaxoh Addah Leeh Gadda Kee Amolladih Leeh Luddal Cattiimak Geytimam Qaddoose. 

Ta Cugayso Qasri Teknolojit Itiyoppiyak Lee Luddal Assakat Lem, Baaxoh Addah Leeh Gaddit Yantifiqenim Osisaanam, Tonnah Hawa Xisneh Leeh Gaddih Xinniso Ginaanam Kinnim Ta Malaak Yiysixxige.